കൊണ്ടോട്ടി: ദുബായിൽ നിന്നെത്തിയ യാത്രക്കാരന്‍റെ സ്വർണമാല മോഷ്ടിച്ച കേസിൽ കരിപ്പൂർ കസ്റ്റംസ് ഹവിൽദാർ അറസ്റ്റിൽ. ആലുവ പാനായിക്കുളം സ്വദേശി അബ്ദുൽ കരീമിനെയാണ്(51) കരിപ്പൂർ പോലീസ് അറസ്റ്റ് ചെയ്തത്.
കോഴിക്കോട് കക്കട്ടിൽ സ്വദേശി കുഞ്ഞിരാമൻ നൽകിയ പരാതിയിലാണ് അറസ്റ്റ്. കരിപ്പൂർ കസ്റ്റംസ് ഹാളിൽ സ്ഥാപിച്ച സിസിടിവി ദൃശ്യത്തിൽ കരീം സ്വർണമാല അപഹരിക്കുന്നത് വ്യക്തമായതോടെയാണ് അറസ്റ്റ്. ഇയാളെ കസ്റ്റംസ് ഡെപ്യൂട്ടി കമ്മീഷണർ സസ്പെൻഡ് ചെയ്തു. കഴിഞ്ഞ മേയ് 19ന് കുഞ്ഞിരാമനും ഭാര്യയും ദുബായിൽ നിന്ന് കരിപ്പൂരിൽ മടങ്ങിവരുന്നതിനിടെയാണ് സംഭവം.
കസ്റ്റംസ് ഹാളിൽ ഉദ്യോഗസ്ഥർ ആവശ്യപ്പെട്ടതനുസരിച്ച് പരിശോധനയ്ക്കായി സ്വർണമാലയും പേഴ്സും കയ്യിലുണ്ടായിരുന്ന ബാഗും നൽകി. പരിശോധന പൂർത്തിയായതിനു ശേഷം എക്സ്റേ മെഷീന്‍റെ എതിർവശത്ത് എത്തിയ ട്രേയിൽ നിന്ന് പേഴ്സും ബാഗും തിരിച്ചെടുത്തു. സ്വർണമാല ഭാര്യ എടുത്തിട്ടുണ്ടെന്ന നിഗമനത്തിൽ കുഞ്ഞിരാമൻ പുറത്തേക്ക് കടക്കുകയും ചെയ്തു. പിന്നീട് വീട്ടിലെത്തിയപ്പോഴാണ് മാല നഷ്ടമായ വിവരം അറിയുന്നത്.
തൊട്ടടുത്ത ദിവസം തന്നെ ഇയാൾ എയർപോർട്ട് മാനേജരെ വിവരം അറിയിച്ചു. ഇവർ കസ്റ്റംസ് വിഭാഗത്തിലെത്തി അന്വേഷിച്ചെങ്കിലും മാല കണ്ടെത്താനായില്ല. കസ്റ്റംസിൽ കണ്ടുകിട്ടുന്ന സാധനങ്ങൾ സൂക്ഷിക്കുന്നതിനുളള ലോസ്റ്റ് ആൻഡ് ഫൗണ്ട് രജിസ്റ്റർ ഉദ്യോഗസ്ഥർ പരിശോധിച്ചെങ്കിലും ഇതു സംബന്ധിച്ച് രേഖപ്പെടുത്തിയിട്ടുമുണ്ടായിരുന്നില്ല.
തുടർന്ന് ഇദ്ദേഹം കരിപ്പൂർ പോലീസിൽ പരാതി നൽകുകയായിരുന്നു. ഇതിന്‍റെ അടിസ്ഥാനത്തിൽ കരിപ്പൂർ പോലീസ് കസ്റ്റംസ് ഹാളിലെ സിസിടിവി ദൃശ്യങ്ങൾ പരിശോധിക്കണമെന്നാവശ്യപ്പെട്ട് എയർപോർട്ട് ഡയറക്ടർക്ക് കത്ത് നൽകുകയായിരുന്നു. സിസിടിവി പരിശോധനയിലാണ് മാല മോഷണം വ്യക്തമായത്. യാത്രക്കാരൻ ട്രേയിൽ മറന്ന മാല കരീം എടുത്ത് മാറ്റിവച്ചശേഷം മാല എടുത്ത് കീശയിലേക്കിട്ട് ട്രേ പഴയ സ്ഥലത്ത് തന്നെ വയ്ക്കുന്നതാണ് ദൃശ്യത്തിൽ വ്യക്തമായി കാണുന്നത്.
കരിപ്പൂർ എസ്ഐ കെ.ബി. ഹരികൃഷ്ണൻ, എഎസ്എമാരായ ദേവദാസ്, അലവിക്കുട്ടി, ബാലകൃഷ്ണൻ, സിവിൽ പൊലീസ് ഓഫീസർമാരായ പി. മുരളീധരൻ, ഷഹബിൻ, മുഹമ്മദ് ഹുസൈൻ എന്നിവരടങ്ങിയ സംഘമാണ് അറസ്റ്റ് ചെയ്തത്. പ്രതിയെ മഞ്ചേരി ജുഡീഷൽ മജിസ്ട്രേറ്റ് കോടതി റിമാൻഡ് ചെയ്തു.
