തൃശൂർ: ബസിലെ മോഷണങ്ങളെക്കുറിച്ച് സിറ്റി പോലീസിന്‍റെ ഒാൺലൈൻ മുന്നറിയിപ്പ് വീഡിയോ ഫലം കണ്ടു. കെഎസ്ആർടിസി ബസിൽ മോഷണശ്രമത്തിനിടെ തമിഴ്നാട് സ്വദേശിനിയെ യാത്രക്കാർ കൈയോടെ പിടികൂടി പോലീസിൽ ഏൽപ്പിച്ചു.
കഴിഞ്ഞദിവസം തൃശൂരിലേക്കു വരികയായിരുന്ന ബസിൽ യാത്രക്കാരന്‍റെ ബാഗിൽനിന്നു പണം മോഷ്ടിക്കാൻ ശ്രമിക്കുന്നതിനിടെ അണ്ണാമല സ്വദേശി സുബിത(25)യാണ് പിടിയിലായത്.
മോഷ്ടാക്കൾ തിരക്കുള്ള ബ‌സുകളിൽ മോഷണം നടത്തുന്നതു വ്യക്തമാക്കുന്ന വീഡിയോയാണു പ്രചരിച്ചിരുന്നത്. ഇതാണു യാത്രക്കാരന്‍റെ ജാഗ്രതയ്ക്കു കാരണമായത്.
മോഷണം നടന്നിരുന്നുവെങ്കിൽ ബാഗിലുണ്ടായിരുന്ന 15,000 രൂപ നഷ്ടപ്പെടുമായിരുന്നുവെന്നു യാത്രക്കാരൻ പറഞ്ഞു. അറസ്റ്റിലായ പ്രതിയെ കോടതിയിൽ ഹാജരാക്കി റിമാൻഡ് ചെയ്തു.
തൃശൂർ പൂരത്തോടനുബന്ധിച്ചുള്ള തിരക്ക് കണക്കിലെടുത്തു സ്വരാജ് റൗണ്ട്, തേക്കിൻകാട് മൈതാനം, എക്സിബിഷൻ ഗ്രൗണ്ട് എന്നിവിടങ്ങളിൽ കൂടുതൽ പോലീസുദ്യോഗസ്ഥരെയും മഫ്ടി പോലീസിനെയും വിന്യസിച്ചിട്ടുണ്ട്.
24 മണിക്കൂറും പോലീസ് സഹായത്തിനു 112 എന്ന നന്പറിൽ വിളിക്കാമെന്നു പോലീസ് അറിയിച്ചു. തൃശൂർ സിറ്റി പോലീസ് കൺട്രോൾ റൂം: 04872424193.
