കണ്‍മുന്നിൽ കാണുന്ന സകലതും കൈക്കലാക്കി കടന്നു കളയുമെന്നതാണ് കള്ളന്മാരെക്കുറിച്ച് പൊതുവെയുള്ള ധാരണ. ചിലപ്പോൾ അവർ കവരുന്നതിൽ വിലപ്പെട്ട പല രേഖകളും മറ്റ് അനുബന്ധ കാര്യങ്ങളും ഉണ്ടാകാം.
ഇപ്പോഴിത ഒരു മോഷണത്തിന് ഇരയായ നൗഫൽ കാരാട്ട് എന്ന യുവാവിന്‍റെ ഫേസ്ബുക്ക് കുറിപ്പാണ് ഏറെ കൗതുകകരമാകുന്നത്. കാരണം ഒരു ദീർഘദൂര യാത്രക്കിടെ തന്‍റെയും സുഹൃത്തിന്‍റെയും പേഴ്സ് കവർന്ന മോഷ്ടാവിനെ നന്ദിയോടെയാണ് നൗഫൽ സ്മരിക്കുന്നത്.
പാന്‍റ്സിന്‍റെ പോക്കറ്റ് കീറി പേഴ്സ് കൈക്കലാക്കിയ കള്ളൻ പണം മാത്രമാണ് അതിനുള്ളിൽ നിന്നും എടുത്തതെന്ന് നൗഫൽ ആശ്വാസത്തോടെ പറയുന്നു. മാത്രമല്ല അതിനുള്ളിലെ വിലപ്പെട്ട പല രേഖകളും വിലകൂടിയ കാമറയും മൊബൈൽ ഫോണും ഒന്നും തന്നെ ആ മോഷ്ടാവ് എടുത്തിരുന്നില്ല.
പൈസ നമുക്ക് വീണ്ടും പെട്ടെന്ന് ഉണ്ടാക്കാമെങ്കിലും ലൈസൻസ്, എടിഎം, ആധാർ തുടങ്ങിയ ഡോക്യൂമെന്റ്സ് നഷ്ടപ്പെട്ടാൽ പിന്നെ അതുണ്ടാക്കാൻ നമ്മൾ ഒരുപാട് ഓടേണ്ടി വരും എന്നാണ് നൗഫൽ പറയുന്നത്.
അതിനിടവരുത്തി തന്നെയും സുഹൃത്തിനെയും കഷ്ടപ്പെടുത്തുവാൻ തുനിയാതിരുന്ന മോഷ്ടാവിനെ നന്ദിയോടെയാണ് നൗഫൽ ഓർക്കുന്നത്. “മറ്റു കള്ളന്മാർ ഇത് കാണുന്നുണ്ടെങ്കിൽ മോഷ്ടിക്കുന്പോൾ ഇങ്ങനെ മോഷ്ടിക്കണം എന്ന് അഭ്യർത്ഥിക്കുന്നു’ എന്ന് പറഞ്ഞാണ് നൗഫൽ തന്‍റെ കുറിപ്പ് അവസാനിപ്പിക്കുന്നത്.
