19കാരിയായ പെണ്‍കുട്ടി 12-ാംക്ലാസ് പരീക്ഷയില്‍ റാങ്ക് നേടുന്നത് അത്ര പുതുമയുള്ള കാര്യമല്ല. എന്നാല്‍ അവളുടെ വിവാഹം 15-ാം വയസില്‍ കഴിഞ്ഞതാണെന്നും അവള്‍ രണ്ടര വയസുള്ള കുട്ടിയുടെ അമ്മയാണെന്നും അറിഞ്ഞാല്‍ ആരും ഒന്ന് അമ്പരക്കും. ത്രിപുര സ്വദേശിയായ സംഗമിത്ര ദേബാണ് ഈ താരം.
ത്രിപുര സെക്കന്‍ഡറി എഡ്യൂക്കേഷന്‍ ബോര്‍ഡിന്റെ പന്ത്രണ്ടാം ക്ലാസ് പരീക്ഷയില്‍ 92.6 % മാര്‍ക്ക് സ്വന്തമാക്കിയതാണ് സംഗമിത്ര ദേബ് ആദ്യ പത്തിനുള്ളില്‍ റാങ്ക് നേടിയത്.
എല്ലാ വിഭാഗങ്ങളില്‍നിന്നുമായി ഒന്‍പതാം റാങ്കും ആര്‍ട്സ് വിഭാഗത്തില്‍ ഏഴാം റാങ്കുമാണ് സംഗമിത്ര ദേബിന്. ത്രിപുരയിലെ ഗാന്ധിഗ്രാം പട്ടണത്തില്‍ ഭര്‍തൃവീട്ടുകാര്‍ക്കൊപ്പമാണ് സംഗമിത്ര താമസിക്കുന്നത്.
ഭര്‍ത്താവ് രാജു ഘോഷ് ബി.എസ്.എഫ്. ജവാനാണ്. വിവാഹം കഴിഞ്ഞ് ഒരുവര്‍ഷം കഴിഞ്ഞായിരുന്നു പത്താം ക്ലാസ് പരീക്ഷ. 77 ശതമാനം നേടിയാണ് അന്നു വിജയിച്ചത്. ഭര്‍ത്താവിന്റെ വീട്ടുകാര്‍ ഒരുപാട് സഹായിച്ചുവെന്നും ഇതേ രീതിയില്‍ ബിരുദം നേടുകയാണു ലക്ഷ്യമെന്നും സംഗമിത്ര പറയുന്നു.
ഇതേ സമയം തന്നെ ത്രിപുരയുടെ ഗ്രാമീണ മേഖലയില്‍ നടക്കുന്ന ശൈശവ വിവാഹങ്ങളെക്കുറിച്ചുള്ള ചര്‍ച്ചകള്‍ക്ക് സംഗമിത്രയുടെ കഥ വഴിവെച്ചിരിക്കുകയാണ് ഇപ്പോള്‍. രാജ്യത്ത് ശൈശവ വിവാഹങ്ങളുടെ എണ്ണത്തില്‍ രണ്ടാം സ്ഥാനത്താണ് ത്രിപുര.
