കേരളക്കരയെ ഒന്നാകെ ഞെട്ടിച്ച സംഭവമായിരുന്നു കൂടത്തായി കൊലപാതകം. ഭർത്താവിനേയും കുടുംബാംഗങ്ങളേയും സയനൈഡ് ഉപയോഗിച്ച് കൊലപ്പെടുത്തിയ സംഭവം ടെലിവിഷൻ പരന്പരയാകുന്നു. കൂടത്തായി കൊലപാതകം സിനിമയാകുന്നുവെന്ന റിപ്പോർട്ടുകൾ നേരത്തെ പുറത്തുവന്നിരുന്നു.
സീരിയലിൽ ജോളിയായി എത്തുന്നത് നടി മുക്തയാണ്. വിവാഹ ശേഷം അഭിനയത്തിന് ഇടവേള നൽകിയിരിക്കുന്ന മുക്ത വീണ്ടും കാമറയ്ക്ക് മുന്നിൽ മടങ്ങി എത്തുകയാണ്. മുക്തയ്ക്ക് എല്ലാവിധ ആശംസയുമായി റിമി ടോമി രംഗത്തെത്തിയിട്ടുണ്ട്. ജനുവരി 13-ന് എത്തുന്ന സീരിയലിന്‍റെ പ്രൊമോ വീഡിയോ ഷെയർ ചെയ്തുകൊണ്ടാണു നാത്തൂന് റിമി ആശംസ നേർന്നിരിക്കുന്നത്.
പാലാമറ്റം കുടുംബത്തിലെ മൂന്നുപേരെ അടക്കിയ കല്ലറയ്ക്ക് സമീപം മഴയത്ത് കുടയുമായി നിൽക്കുന്ന സ്ത്രീയായാണ് മുക്ത പ്രൊമോ വീഡിയോയിൽ പ്രത്യക്ഷപ്പെടുന്നത്. ഫ്ളവേഴ്സ് മൂവി ഇന്‍റർനാഷണൽ ആണ് സീരിയൽ അവതരിപ്പിക്കുന്നത്.
കൂടത്തായി കൊലക്കേസുമായി ബന്ധപ്പെട്ട് രണ്ട് സിനിമകൾ ഒരുങ്ങുന്നതായും റിപ്പോർട്ടുകളുണ്ട്. ബന്ധുക്കളായ ആറു പേരുടെ മരണതിനു പിന്നിൽ ജോളിയാണെന്ന് ആരോപിക്കപ്പെടുകയായിരുന്നു. സയനൈഡ് ഉപയോഗിച്ചാണ് കൊലപാതകങ്ങൾ ഒക്കെയും നടത്തിയതെന്നും സംശയം ഉയർന്നു. തുടർന്ന് നടത്തിയ അന്വേഷണത്തിനൊ ടുവിലാണ് കേസിലെ സത്യാവസ്ഥ പുറത്തു വന്നത്.
