മധ്യ ഈജിപ്തിലെ മിന്‍യ പ്രവിശ്യയിലെ പുരാതന ശവകുടീരത്തിൽനിന്ന് 50 മമ്മികൾ കണ്ടെത്തി. ബിസി 305-30 കാലത്തെ മമ്മികളാണ് കണ്ടെത്തിയത്. സുരക്ഷിതമായി അടക്കം ചെയ്ത നിലയിലുള്ള മമ്മികള്‍ക്ക് കാര്യമായ കേടുപാടുകള്‍ സംഭവിച്ചിട്ടില്ലെന്നത് ശ്രദ്ധേയമാണ്.
മിന്‍യയിൽ ടുണ എൽ ഗെബെലിൽ മാസങ്ങൾ നീണ്ട ഗവേഷണത്തിന് ഒടുവിലാണ് മമ്മികൾ കണ്ടെത്തിയത്. ഒമ്പതു മീറ്ററോളം മണ്ണ് നീക്കം ചെയ്താണ് മമ്മികള്‍ പുറത്തെടുത്തത്. കണ്ടെത്തിയ മമ്മികളിൽ 12 എണ്ണം കുട്ടികളുടെയാണ്.
ഈജിപ്ഷ്യന്‍ രാജവംശങ്ങളുടെ കാലത്ത് ഉന്നത പദവികൾ വഹിച്ചിരുന്നവരുടെ മമ്മികളാണ് ഇതെന്ന് കരുതുന്നു. മമ്മികളിൽ ചിലത് ലിനൻ തുണി ഉപയോഗിച്ചാണ് പൊതിഞ്ഞിരിക്കുന്നത്. ഇവ വിശദമായി പരിശോധിക്കാനും ഗവേഷകർ ഒരുങ്ങുകയാണ്.
