കോഴിക്കോട്: തട്ടം വിവാദം മുസ് ലിം ലീഗിനെ തിരിഞ്ഞുകുത്തുന്നു. സിപിഎം നേതാവ് കെ. അനില്‍കുമാര്‍ ഉയര്‍ത്തിവിട്ട വിവാദം കെട്ടടങ്ങിയെങ്കിലും മുസ് ലിം ലീഗിനകത്ത് വിവാദം പുതിയ പ്രശ്നങ്ങള്‍ സൃഷ്ടിച്ചിരിക്കുകയാണ്.
സമസ്തയെ വിമര്‍ശിച്ച മുസ് ലിംലീഗ് സംസ്ഥാന ജനറല്‍ സെക്രട്ടറി പി.എം.എ. സലാമിനെതിരേ ദേശീയ ജനറല്‍ സെക്രട്ടറി പി.കെ. കുഞ്ഞാലിക്കുട്ടിക്ക് സമസ്ത പരാതി നല്‍കി.
മുഖ്യമന്ത്രിയുടെ ഫോണ്‍ കിട്ടിയാല്‍ എല്ലാമായെന്ന് ചിന്തിക്കുന്ന ആളുകളും നമ്മുടെ സമുദായത്തിലുണ്ടെന്നും ഇവരുടെ പാര്‍ട്ടിയോടുളള്ള സമീപനം എന്താണെന്ന് അവര്‍ പറയണം എന്നുമായിരുന്നു സലാമിന്‍റെ വിമര്‍ശനം.
തട്ടം വിവാദത്തില്‍ സമസ്ത ശക്തമായി പ്രതികരിക്കാത്തതിനെതിരേയായിരുന്നു വാര്‍ത്താസമ്മേളനത്തില്‍ സലാമിന്‍റെ വിമര്‍ശനം.
സലാമിനെ കൂടാതെ സംസ്ഥാന വൈസ് പ്രസിഡന്‍റ് അബ്ദുറഹിമാന്‍ കല്ലായിയെയും പരാതിയില്‍ പേരെടുത്തു പറഞ്ഞിട്ടുണ്ട്.
സമസ്ത കേരള ജംഇയത്തുല്‍ ഉലമയെയും ആദരണീയരായ ഉസ്താദുമാരെയും സംഘടനാ സംവിധാനങ്ങളെയും പൊതുവേദികളിലും സമൂഹ മാധ്യമങ്ങളിലും ലീഗിന്‍റെ ഉത്തരവാദപ്പെട്ട നേതാക്കള്‍ പരിഹസിക്കുകയും ആക്ഷേപിക്കുകയും ചെയ്യുന്ന പ്രവണത വര്‍ധിക്കുന്നതായി സമസ്തയുടെ പരാതിയില്‍ പറയുന്നു.
പാര്‍ട്ടിയുടെ ഉത്തരവാദപ്പെട്ടവരില്‍നിന്ന് നിരന്തരമുണ്ടാകുന്ന ഇത്തരം സമീപനങ്ങള്‍ സുന്നി പ്രസ്ഥാന രംഗത്ത് വളരെയധികം പ്രയാസം ഉണ്ടാക്കുന്നുണ്ട്.
ഈ സാഹചര്യത്തില്‍ ശക്തമായ പ്രതിഷേധം േരഖപ്പെടുത്തുന്നതിനൊപ്പം സമുദായത്തിന്‍റെ പൊതുവായ കെട്ടുറപ്പിന് എതിരായ സമീപനങ്ങളില്‍ നിന്ന് ഉത്തരവാദപ്പെട്ടവര്‍ വിട്ടുനില്‍ക്കണമെന്ന് സമസ്ത പരാതിയില്‍ പറയുന്നു.
എസ്‌വൈഎസ് സംസ്ഥാന ജനറല്‍ സെക്രട്ടറി മുഹമ്മദ് കോയ തങ്ങള്‍, ജംഇയത്തുല്‍ മുഅല്ലിമീന്‍ സംസ്ഥാന ജനറല്‍ സെക്രട്ടറി വാക്കോട് മൊയ്തീന്‍കുട്ടി ഫൈസി, എസ്‌വൈഎസ് സംസ്ഥാന വര്‍ക്കിംഗ് സെക്രട്ടറി അബ്ദുള്‍ ഹമീദ് ഫൈസി അമ്പലക്കടവ്, സമസ്ത എംപ്‌ളോയീസ് അേസാസിയേഷന്‍ സംസ്ഥാന പ്രസിഡന്‍റ് മുസ്തഫ മുണ്ടുപാറ തുടങ്ങി 21 നേതാക്കളാണ് പരാതിയില്‍ ഒപ്പിട്ടിരിക്കുന്നത്.
സര്‍ക്കാരിനോട് സൗഹൃദത്തോടെയുള്ള സമീപനമാണ് സമസ്ത സ്വീകരിക്കുന്നതെന്ന് സമസ്ത കേരള ജംഇയത്തുല്‍ ഉലമ അധ്യക്ഷന്‍ മുഹമ്മദ് ജിഫ്‌റി മുത്തുക്കോയ തങ്ങള്‍ മട്ടാഞ്ചേരിയില്‍ പറഞ്ഞു.
ആവശ്യങ്ങള്‍ അവരുമായി സംസാരിക്കും. ചിലപ്പോള്‍ ഫോണില്‍ പറയും. അല്ലെങ്കില്‍ നേരില്‍ കാണും. അതൊക്കെ ആക്ഷേപമായി പറയുന്നത് ശരിയല്ലെന്ന് സലാമിനു മറുപടിയായി അദ്ദേഹം പറഞ്ഞു.
സലാമിനെതിരേ നടപടി വേണമെന്ന ആവശ്യം സമസ്തയില്‍ ശക്തമായിട്ടുണ്ട്. സംസ്ഥാന ജനറല്‍ സെക്രട്ടറി സ്ഥാനത്തുനിന്ന് നീക്കുകയോ അല്ലെങ്കില്‍ താക്കീത് ചെയ്യുകയോ വേണമെന്നാണ് ആവശ്യം. സലാമിന്‍റെ നിലപാടില്‍ മിക്ക നേതാക്കള്‍ക്കും അതൃപ്തിയാണുള്ളത്.
