തിരുവനന്തപുരം: മുതലപ്പൊഴിയിൽ വീണ്ടും അപകടം. ഇന്ന് രാവിലെ വള്ളം മറിഞ്ഞു മത്സ്യത്തൊഴിലാളിയെ കാണാതായി. അഞ്ചുതെങ്ങ് സ്വദേശി ബെനഡിക്റ്റിനെ(45)യാണ് കാണാതായത്. ഇന്നു രാവിലെ 6.20 നാണു തിരയിൽപ്പെട്ട് വള്ളം മറിഞ്ഞത്.
നാലു പേരാണ് വള്ളത്തില്‍ ഉണ്ടായിരുന്നത്. കടലിൽ വീണ മൂന്നു പേരെ രക്ഷപ്പെടുത്തി. രണ്ടുപേരെ മറൈൻ ഇൻഫോഴ്സ്മെന്‍റാണ് രക്ഷപ്പെടുത്തിയത്. ഒരാളെ മറ്റൊരു വള്ളത്തിൽ കയറ്റി രക്ഷപ്പെടുത്തി. മത്സ്യബന്ധനം കഴിഞ്ഞു തിരികെ വരുമ്പോഴായിരുന്നു അപകടം.
കാണാതായ ആളെ കണ്ടെത്താൻ മത്സ്യത്തൊഴിലാളികളും കോസ്റ്റൽ പോലീസും മറൈൻ എൻഫോഴ്‌സ്മെന്‍റും തെരച്ചിൽ തുടരുകയാണ്. അഞ്ചുതെങ്ങ് സ്വദേശി ജോബോയുടെ സിന്ദുയാത്ര മാതാ എന്ന വള്ളമാണ് അപകടത്തിൽപ്പെട്ടത്.
