കണ്ണൂർ: സർക്കാർ ജീവനക്കാർ പണിമുടക്കിൽ പങ്കെടുക്കരുതെന്ന ഹൈക്കോടതി വിധിക്കെതിരെ സിപിഎം കണ്ണൂർ ജില്ലാ സെക്രട്ടറി എം.വി. ജയരാജൻ.
പണിമുടക്കുന്നത് കോടതി വിലക്കിയത് ദൗർഭാഗ്യകരമാണെന്നും കോടതിയുടേത് പഴയ ബ്രിട്ടീഷ് രാജിന്‍റെ ശബ്ദമെന്നാണെന്നും എം.വി. ജയരാജൻ കുറ്റപ്പെട‌ുത്തി.
കോടതിയുടെ ഔദാര്യമല്ല
തൊഴിലാളികൾക്കു പണിയെടുക്കാനും പണി മുടക്കാനുമുള്ള അവകാശമുണ്ട്. സമരം തൊഴിലാളിയുടെ അവകാശമാണ്. കോടതിയുടെ ഔദാര്യമല്ല. ജനങ്ങളുടെ ജീവിത പ്രശ്നങ്ങളിലാണ് കോടതി ഇടപെടൽ വേണ്ടത്.
ഇതു വെള്ളരിക്കാപട്ടണമല്ല
പെട്രോൾ വില കുറയ്ക്കണമെന്നോ പൊതുമേഖലാ സ്ഥാപനങ്ങൾ വിറ്റുതുലയ്ക്കരുതെന്നോ കോടതി പറയാത്തത് എന്താണ്.
സമരം ചെയ്യാൻ അവകാശമില്ലെന്ന് പറയാൻ ഇതു വെള്ളരിക്കാപട്ടണമല്ല. കോടതിക്കു ബ്രിട്ടീഷ് പ്രേതം കൂടിയെന്നു പറയേണ്ടി വന്നതു ദൗർഭാഗ്യകരമാണെന്നും ജയരാജൻ വിമർശിച്ചു.
മുന്പും പുലിവാലു പിടിച്ചു
കോടതിയെ വിമർശിച്ചു മുന്പും ജയരാജൻ പുലിവാലു പിടിച്ചിട്ടുണ്ട്. പാതയോരത്തെ പൊതുയോഗം നിരോധിച്ച കോടതി വിധിയ്‌ക്കെതിരെ ജയരാജന്‍ നടത്തിയ പ്രസംഗമാണ് കോടതിയലക്ഷ്യത്തിലേക്കു നയിച്ചത്.
ജഡ്ജിമാരെ ശുംഭന്‍മാര്‍ എന്നു വിളിച്ച ജയരാജനെതിരെ ഹൈക്കോടതി സ്വമേധയാ കേസെടുക്കുകയായിരുന്നു.
അന്ന് തടവ്
എന്നാൽ, ശുംഭന്‍ എന്ന വാക്കിന്‍റെ അര്‍ഥം പ്രകാശം പരത്തുന്നവന്‍ എന്നാണെന്നും വിപരീതാര്‍ഥത്തില്‍ ഉപയോഗിച്ചില്ലെന്നുമായിരുന്നു ജയരാജന്‍ ഹൈക്കോടതിയില്‍ വാദിച്ചിരുന്നത്. എന്നാൽ, കോടതി ഇത് അംഗീകരിച്ചില്ല.
ആറു മാസം തടവ് വിധിച്ചു. ഇതിനെതിരേ സുപ്രീം കോടതിയെ സമീപിച്ചെങ്കിലും ജയരാജന്‍റെ പ്രസംഗം അംഗീകരിക്കാൻ കഴിയാത്തതാണെന്നായിരുന്നു സുപ്രീം കോടതിയുടെയും വിധി.
ആറു മാസത്തെ തടവ് സുപ്രീം കോടതി നാലു ആഴ്ചയാക്കി കുറച്ചു.
