പാരീസ്: ഫ്രഞ്ച് ഓപ്പണ്‍ ടെന്നീസില്‍ പുരുഷ സിംഗിള്‍സില്‍ നൊവാക് ജോക്കോവിച്ചും റഫേല്‍ നദാലും ക്വാര്‍ട്ടര്‍ ഫൈനലില്‍. സ്റ്റെഫാനോസ് സിറ്റ്‌സിപാസ് പുറത്ത്. സ്റ്റാന്‍ വാവ്‌റിങ്കയും കെയ് നിഷികോരിയും ക്വാര്‍ട്ടറില്‍. ഒന്നാം നമ്പര്‍ ജോക്കോവിച്ച് 6-3, 6-2, 6-2ന് ജാന്‍ ലെനാര്‍ഡ് സ്റ്റ്ട്രഫിനെ തോല്‍പ്പിച്ചു. നിലവിലെ ചാമ്പ്യന്‍ നദാല്‍ 6-2, 6-3, 6-3ന് യുവാന്‍ ഇഗ്നാസിയോ ലോന്‍ഡെറോയെ തോല്‍പ്പിച്ചു.
അഞ്ച് സെറ്റ് നീണ്ട പോരാട്ടങ്ങളിലാണ് വാവ്‌റിങ്കയുടെയും നിഷികോരിയുടെയും ജയം. വാവ്‌റിങ്ക 7-6 (8-6), 5-7, 6-4, 3-6, 8-6ന് സിറ്റ്‌സിപാസിനെ തകര്‍ത്തു. ക്വാര്‍ട്ടറില്‍ റോജര്‍ ഫെഡററാണ് എതിരാളി. നിഷികോരി 6-2, 6-7(8-10), 6-2, 6-7(8-10), 7-5ന് ബെനോറ്റ് പിയറിനെ പരാജയപ്പെടുത്തി. ഡൊമിനിക് തീം 6-4, 6-4, 6-2ന് ഗെയ്ൽ മോൺഫിൽസിനെ പരാജയപ്പെടുത്തി ക്വാർട്ടറിലെത്തി.
വനിതാ സിംഗിള്‍സില്‍ സൊളാന്‍ സ്റ്റീഫന്‍സ് 6-4, 6-3ന് ഗാര്‍ബിന്‍ മഗ്‌രുസയെ തോല്‍പ്പിച്ച് ക്വാര്‍ട്ടര്‍ ഫൈനലിലെത്തി. ആഷ് ലി ബര്‍ട്ടി 6-3, 3-6, 6-0ന് സോഫിയ കെനിനെയും മാഡിസണ്‍ കീസ് 6-2, 6-4ന് കാതെറിന സിനിയകോവയെയും പരാജയപ്പെടുത്തി ക്വാര്‍ട്ടര്‍ ഫൈനലിലെത്തി.
