നാദാപുരം: കിണമ്പ്ര കുന്നിൽ നിർമാണ പ്രവർത്തനങ്ങൾ പുരോഗമിക്കുന്ന നാദാപുരം ഗവ. കോളജിൽ മദ്യപാനികൾ മരപ്പലകകൾ തീവച്ച് നശിപ്പിച്ചു. ഇന്ന് പുലര്‍ച്ചെയാണ് തീ പിടിത്തം ഉണ്ടായത്.കോളജിന്‍റെ നിർമാണ പ്രവർത്തനം നടത്തുന്ന ഊരാളുങ്കൽ ലേബർ കോൺട്രാക്റ്റ് സൊസൈറ്റിയുടെ ഉടമസ്ഥതയിലുള്ള മരപ്പലകകൾക്കാണ് തീ പിടിച്ചത്.നാദാപുരം പോലീസും ചേലക്കാട്‌ നിന്നെത്തിയ ഫയർഫോഴ്സും ചേർന്ന് തീയണച്ചു.
30,000 ത്തോളം രൂപയുടെ നാശനഷ്ടം കണക്കാക്കുന്നു.സംഭവ സ്ഥലത്ത് നിന്ന് ഒരു ബുള്ളറ്റ് മോട്ടോർ സൈക്കിളും രണ്ട് യുവാക്കളെയും നാദാപുരം പോലീസ് കസ്റ്റഡിയിലെടുത്തു.മാസങ്ങൾക്ക് മുമ്പും കോളജിന് നേരെ സാമൂഹ്യ വിരുദ്ധരുടെ അക്രമം ഉണ്ടായിരുന്നു.
ജനൽ ചില്ലുകളും, കുടിവെള്ള പൈപ്പുകളും തകർത്തിരുന്നു. രാത്രി കാലങ്ങളിൽ ഇവിടം കേന്ദ്രീകരിച്ച് മദ്യപാനവും പതിവാണെന്ന് പ്രദേശവാസികൾ പറയുന്നു.കോളജ് കോമ്പൗണ്ടിൽ പോലീസും നാട്ടുകാരും നടത്തിയ പരിശോധനയിൽ മദ്യക്കുപ്പിയും മറ്റും കണ്ടെത്തിയിട്ടുണ്ട്.
