മാഡ്രിഡ്: ഡേവിസ് കപ്പ് ക്വാർട്ടർ ഫൈനലിനുള്ള സ്പെയിൻ ടീമിൽ ലോക ഏഴാം നന്പർ താരം റാഫേൽ നദാൽ കളിക്കില്ല. സ്പാനിഷ് ക്യാപ്റ്റൻ കോണ്‍ചിത മാർട്ടിനെസാണ് ഇക്കാര്യം അറിയിച്ചത്. ഒന്നാംറൗണ്ടിൽ ക്രൊയേഷ്യക്കെതിരായ മത്സരത്തിൽ നദാൽ കളിച്ചിരുന്നു. ക്വാർട്ടർ നടക്കുന്നത് കളിമണ്‍ കോർട്ടിൽ അല്ലെങ്കിൽ കളിക്കില്ലെന്ന് താരം സൂചന നൽകിയിരുന്നു.
ഏപ്രിൽ 7 മുതൽ 9വരെ നടക്കുന്ന ക്വാർട്ടറിൽ സെർബിയയാണ് സ്പെയിന്‍റെ എതിരാളി. പാബ്ലോ കരേനോ ബുസ്റ്റ(19), ആൽബർട്ട് റാമോസ്(24), മാർഷൽ ഗ്രാനോലേഴ്സ്(41), ഡബിൾസ് താരം മാർക് ലോപസ് എന്നിവരാണ് സ്പാനിഷ് ടീമിലെ മറ്റ് അംഗങ്ങൾ.
അഞ്ചുവട്ടം ഡേവിസ് കപ്പ് ചാന്പ്യന്മാരായ സ്പെയിൻ ക്വാർട്ടർ ജയിച്ച് സെമിഫൈനലിൽ എത്താനാണ് ലക്ഷ്യമിടുന്നത്. 2012ന് ശേഷം സ്പെയിൻ ഡേവിസ് കപ്പിന്‍റെ സെമിയിൽ കടന്നിട്ടില്ല.
