ഹൈദരാബാദ്: തെലുങ്കു സൂപ്പർ താരം നാഗാർജുനയുടെ ഫാംഹൗസിൽ നിന്ന് മനുഷ്യന്‍റെ അസ്ഥികൂടം കണ്ടെത്തി. അഴുകിയ നിലയിലുള്ള മൃതദേഹത്തിന് ആറു മാസത്തെ പഴക്കമുണ്ട്. ചക്ലി പാണ്ഡുവെന്ന ഫാമിലെ ജോലിക്കാരന്റേതാണ് മൃതദേഹമെന്ന് പോലീസ് പറഞ്ഞു.
തെലുങ്കാനയിലെ രങ്കറെഡ്ഡിയിൽ പാപ്പിറെഡ്ഡിഗുഡയിലുള്ള ഫാംഹൗസിൽ നിന്നാണ് മൃതദേഹം കണ്ടെത്തിയത്. മൃതദേഹത്തിന് ആറു മാസത്തെ പഴക്കമുള്ളതായി പോലീസ് പറഞ്ഞു.ബുധനാഴ്ച കൃഷിസ്ഥലത്തെത്തിയ ഫാം ഹൗസ് ജോലിക്കാരാണ് മൃതദേഹം കണ്ടെത്തിയത്.
രൂക്ഷഗന്ധം അനുഭവപ്പെട്ടതിനെ തുടർന്ന് ഫാംഹൗസ് തുറന്ന് പരിശോധിച്ചപ്പോഴാണ് മൃതദേഹം കണ്ടത്. ഇതേത്തുടർന്നു വില്ലേജ് റവന്യൂ ഉദ്ദ്യോഗസ്ഥനെയും പോലീസിനെയും വിവരം അറിയിക്കുകയായിരുന്നു. ആത്മഹത്യയാണെന്നാണ് പോലീസ് പറയുന്നത്. സഹോദരന്റെ മരണത്തെത്തുടർന്നുണ്ടായ മനോവിഷമത്തെത്തുടർന്നാണ് ചക്ലി ആത്മഹത്യ ചെയ്തതെന്നാണ് റിപ്പോർട്ട്. ഇയാൾ വിവാഹിതനല്ല. സംഭവത്തെക്കുറിച്ച് അന്വേഷണം നടക്കുന്നതായി പോലീസ് അറിയിച്ചു.
പാപ്പിറെഡ്ഡിഗുഡയിൽ 50 ഏക്കർ വരുന്ന ഭൂമിയിലാണ് നാഗാർജുനയുടെ ഫാംഹൗസ്. ഒരു വർഷം മുന്പാണ് താരം ഈ സ്ഥലം വാങ്ങിയത്. ഈ മാസം ആദ്യം നാഗാർജുനയുടെ ഭാര്യ ഫാം സന്ദർശിച്ചിരുന്നു.
