ഉപ്പുതറ: ഇടുക്കിയിൽ നവകേരള സദസ് നടന്ന് ഒന്നര മാസം കഴിയുമ്പോൾ ലഭിച്ച പാരാതികളിൽ തുടർനടപടി എടുത്തത് ഇരുപത് ശതമാനത്തിൽ താഴെ അപേക്ഷകളിൽ മാത്രം. പട്ടയം, ചികിത്സാസഹായം, വീട് എന്നിവയ്ക്കായി ലഭിച്ച പരാതികളാണ് പരിഹാരം കാണാൻ കഴിയാത്തവയിൽ ഭൂരിഭാഗവും.
ഇടുക്കിയിലെ അഞ്ച് നിയോജക മണ്ഡലങ്ങളിൽ നടന്ന നവകേരള സദസിൽ കിട്ടിയത് 42,236 പരാതികളാണ്. ഇതുവരെ നടപടി സ്വീകരിച്ചത് 8,679 പരാതികളിലാണ്. ഏറ്റവും കൂടുതൽ പരാതികൾ കിട്ടിയത് റവന്യു വകുപ്പിനാണ്.
15,570 എണ്ണം. ഇതിൽ 400 എണ്ണത്തിൽ നടപടിയെടുത്തു. കിട്ടിയതിൽ 6,300 ലധികവും ചികിത്സാസഹായത്തിനും 4,500 ഓളം പട്ടയം സംബന്ധിച്ചതുമാണ്. ഇവ പരിഹരിക്കാൻ സർക്കാർ തലത്തിൽനിന്നും ഉത്തരവുകൾ വേണം. 11,501 പരാതികളുള്ള തദ്ദേശ സ്വയംഭരണ വകുപ്പിൽ 5,548 എണ്ണത്തിലാണ് നടപടിയുണ്ടായത്.
ഏറ്റവും കൂടുതൽ പരാതികൾക്ക് പരിഹാരമുണ്ടാക്കിയത് പോലീസാണ്. കിട്ടിയ 280 എണ്ണത്തിൽ 272 ലും നടപടിയെടുത്തു. സഹകരണ വകുപ്പിലെ 2203 എണ്ണത്തിൽ 1009 എണ്ണവും സിവിൽ സപ്ലൈസിലെ 506 എണ്ണത്തിൽ 137 എണ്ണത്തിലും തൊഴിൽ വകുപ്പിലെ 586 എണ്ണത്തിൽ 291 എണ്ണത്തിലും നടപടികളെടുത്തു.
വനംവകുപ്പിന് 154 ൽ 91 എണ്ണത്തിലാണ് നടപടിയെടുക്കാനായത്. ലൈഫ് ഭവന പദ്ധതിയിലുൾപ്പെടെ വീടിനായി കിട്ടിയ അപേക്ഷകളിൽ തീർപ്പുണ്ടാക്കാനായിട്ടില്ല. ഭൂപതിവ് നിയമ ഭേദഗതി ഗവർണർ ഒപ്പിട്ടാൽ കൂടുതൽ പരാതികൾക്ക് വേഗത്തിൽ പരിഹാരമുണ്ടാക്കാൻ കഴിയുമെന്നാണ് ജില്ലാ ഭരണകൂടം കണക്കുകൂട്ടുന്നത്.
