നീണ്ട ഇടവേളക്ക് ശേഷം സിനിമയിലേക്ക് തിരിച്ചുവരികയാണ് നടി നവ്യ നായർ. സിനിമകളിൽ ഇല്ലാതിരുന്നപ്പോൾ പോലും ഡാൻസിലൂടെയും സോഷ്യൽ മീഡിയയിലൂടെയും താരം നിറഞ്ഞുനിന്നിരുന്നു.
ഇപ്പോഴിതാ നവ്യനായർ തന്‍റെ ഫേസ്ബുക്ക് പേജിൽ പങ്ക് വച്ചിരിക്കുന്ന സെൽഫിയും കുറിപ്പുമാണ് സോഷ്യൽ മീഡിയയിൽ വൈറലായിരിക്കുന്നത്.
ഒരു ആരാധകനുമൊത്തുള്ള സെൽഫിയാണ് നവ്യ പങ്ക് വച്ചിരിക്കുന്നത്. ചിത്രത്തിനോടൊപ്പം ആരാധകൻ നവ്യയോട് ചോദിച്ച ചില സംശയങ്ങളും താരം കുറിച്ചിട്ടുണ്ട്.
മോളേ പേരെന്താ… നവ്യ നായർ എന്ന് മറുപടി പറഞ്ഞപ്പോൾ വീണ്ടും ഒരു സംശയം കൂടി. നവ്യ നായർ ഫസ്റ്റോ അതോ സെക്കൻഡോ, വല്ലവരും വന്നോ… ഇല്ല ചേട്ടാ ഞാൻ പഴയ ആളു തന്നെയാണെന്ന് പറഞ്ഞ് മുഖത്തെ കണ്ണട മാറ്റി.’’ എന്നാണ് നവ്യ ഫേസ്ബുക്കിൽ കുറിച്ചിരിക്കുന്നത്.
ഷൂട്ടിംഗ് പുരോഗമിക്കുന്ന നവ്യയുടെ ഒരുത്തീയെന്ന ചിത്രത്തിന്‍റെ സെറ്റിൽ വച്ചായിരുന്നു ഈ സംഭവം. തനി നാട്ടിൻപുറത്തുകാരിയായാണ് ചിത്രത്തിൽ നവ്യ എത്തുന്നത് .
ചിത്രം സംവിധാനം ചെയ്യുന്നത് വി.കെ പ്രകാശാണ്. ബെൻസി പ്രൊഡക്ഷൻസിന്റെ ബാനറിൽ ബെൻസി നാസറാണ് ചിത്രം നിർമിക്കുന്നത്. പേരു സൂചിപ്പിക്കുന്നതു പോലെ സ്ത്രീ കേന്ദ്രീകൃത കഥയാകാം ചിത്രമെന്നാണു സൂചന.
