തെന്നിന്ത്യൻ സിനിമയിൽ തന്‍റേതായ ഒരിടം കണ്ടെത്തി ലേഡി സൂപ്പർ സ്റ്റാറായി ഉയർന്നുവന്ന നടിയാണ് നയൻതാര. മലയാളത്തിലൂടെ വന്ന് അന്യഭാഷകളിലേക്കും ചേക്കേറിയ നടിയാണ് നയൻതാര. 20 വർഷത്തെ കഠിനാധ്വാനമാണ് തിരുവല്ലക്കാരിയായ ഡയാന കുര്യനെ ഇന്ന് കാണുന്ന നയൻതാരയാക്കി മാറ്റിയത്.
മുപ്പത്തിയൊമ്പതുകാരിയായ നയൻസാണ് ഇന്ന് തെന്നിന്ത്യൻ സിനിമയിൽ ഏറ്റവും കൂടുതൽ പ്രതിഫലം വാങ്ങുന്ന നായിക. ഇതുവരെ ഏകദേശം എൺപതോളം സിനിമകളിൽ അഭിനയിച്ചുകഴിഞ്ഞു. സംവിധായകനും തിരക്കഥാകൃത്തും ഗാനരചയിതാവുമെല്ലാമായ വിഘ്നേഷ് ശിവനും മക്കളായ ഉയിരും ഉലകവുമാണ് ഇപ്പോൾ താരത്തിന്‍റെ ലോകം.
20 വർഷം കൊണ്ട് കോടികളുടെ സ്വത്തുകളാണ് നയൻതാര അഭിനയത്തിലൂടെയും പരസ്യത്തിലൂടെയും വിവിധ ബിസിനസിലൂടെയുമായി സമ്പാദിച്ചത്. റിപ്പോർട്ടുകൾ പ്രകാരം നയൻതാരയുടെ ഏറ്റവും വിലപിടിപ്പുള്ള സ്വത്തുക്കളിൽ ഒന്ന് 100 കോടി രൂപ വിലയുള്ള ആഡംബര വീടാണ്. ഇത് നടിയുടെ നാല് ആഡംബര വീടുകളിൽ ഒന്ന് മാത്രമാണ്.
തമിഴ്‌നാട് മുതൽ മുംബൈ വരെ വ്യാപിച്ചുകിടക്കുന്നതാണ് നയൻതാരയുടെ സ്വത്തുക്കൾ. നിലവിൽ ഭർത്താവിനും മക്കൾക്കുമൊപ്പം മുംബൈയിലെ ഒരു ഫോർ ബിഎച്ച്കെ ഫ്ലാറ്റിലാണ് താരം താമസിക്കുന്നത്. ഈ വിശാലമായ ഫ്ലാറ്റിൽ ഒരു സ്വകാര്യ സിനിമാ ഹാൾ, നീന്തൽക്കുളം, മൾട്ടിഫംഗ്ഷണൽ ജിം എന്നിവയുൾപ്പെടെയുള്ള സൗകര്യങ്ങൾ ഒരിക്കിയിരിക്കുന്നു.
മുംബൈയിലെ വസതിക്ക് പുറമെ ഹൈദരാബാദിലെ ബഞ്ചാര ഹിൽസിൽ നയൻതാരയ്ക്ക് ഏകദേശം 30 കോടി രൂപ വിലമതിക്കുന്ന രണ്ട് അപ്പാർട്ട്‌മെന്‍റുകളുമുണ്ട്. അടുത്തിടെ താരത്തിന് ഭർത്താവ് മൂന്ന് കോടി രൂപ വിലമതിക്കുന്ന പുതിയ കാർ സമ്മാനിച്ചിരുന്നു. 2.96 കോടി രൂപ വിലയുള്ള മെഴ്സിഡീസ് ബെൻസിന്‍റെ അത്യാഡംബര എസ്‍യുവാണ് നയൻതാരയ്ക്ക് പിറന്നാൾ സമ്മാനമായി വിക്കി സമ്മാനിച്ച ജിഎൽഎസ് 600. 1.76 കോടി രൂപ വിലയുള്ള ഒരു വാഹനമാണ് നയൻതാരയുടെ ലക്ഷ്വറി വാഹന ശേഖരത്തിലെ മറ്റൊരു ഹൈലൈറ്റ്.
മൂഡ് അഡ്ജസ്റ്റ് ചെയ്യാവുന്ന ലൈറ്റിംങ് ഈ വാഹനത്തിൽ സജ്ജീകരിച്ചിരിക്കുന്നു. നടിയുടെ ഗാരേജിലെ മറ്റൊരു പ്രത്യേകത ഒരു കോടി രൂപ വിലമതിക്കുന്ന ഒരു കാറാണ്. വിലകൂടിയ ലെതർ ഇന്‍റീരിയറുകളും അത്യാധുനിക സവിശേഷതകളുമാണ് വാഹനത്തിന്‍റെ പ്രധാന പ്രത്യേകത. നൂതന വോയ്‌സ് സെൻസർ സാങ്കേതികവിദ്യയ്ക്ക് പേരുകേട്ടൊരു ലക്ഷ്വറി വാഹനവും നയൻതാരയുടെ ഗാരേജിലുണ്ട്. നിരത്തിലോടുന്ന ലക്ഷ്വറി വാഹനങ്ങൾ മാത്രമല്ല സ്വകാര്യ യാത്രകൾക്കായി ഒരു പ്രൈവെറ്റ് ജെറ്റും താരത്തിനുണ്ട്. ഏകദേശം 50 കോടി രൂപയാണു വില.
സിനിമാ നിർമാണത്തിന് അപ്പുറത്തേക്ക് നീളുന്നതാണ് നയൻതാരയുടെ ബിസിനസുകളും സാമ്പത്തിക നിക്ഷേപങ്ങളും. റെനിത രാജനോടൊപ്പം ചേർന്ന് ലിപ്ബാമുകൾക്ക് മാത്രമായി ദി ലിപ് ബാം കമ്പനി എന്ന സംരംഭം നയൻസിനുണ്ട്. 100ലേറെ വെറൈറ്റി ലിപ്ബാമുകൾ വികസിപ്പിച്ചെടുത്ത ദി ലിപ് ബാം കമ്പനി ലോകത്തിലെ തന്നെ ഇത്തരത്തിലെ വലുതെന്നാണ് ഉടമകൾ അവകാശപ്പെടുന്നത്.
ഡെയ്സി മോർഗൻ എന്ന സംരംഭകയോടൊപ്പം ചേർന്ന് സ്കിൻകെയർ ബ്രാൻഡും അടുത്തിടെ നയൻതാര ആരംഭിച്ചു. ആരാധകർ സ്നേഹപൂർവം വിളിക്കുന്ന നയൻ എന്ന പേര് കൂട്ടിച്ചേർത്ത് 9സ്കിൻ എന്ന പേരിലാണ് പ്രീമിയം ക്വാളിറ്റി സ്കിൻ കെയർ പ്രൊഡക്ട്സ് ബ്രാൻഡ് ആരംഭിച്ചത്. ഡോ. ഗോമതിയുമായി സഹകരിച്ച് ഫെമി9 എന്ന പേരിൽ ഒരു സാനിറ്ററി നാപ്കിൻ ബ്രാൻഡും താരം ആരംഭിച്ചിട്ടുണ്ട്.
ലിപ് ബാം കമ്പനിയിൽ പത്തു കോടി രൂപയാണ് താരം നിക്ഷേപിച്ചിട്ടുള്ളത്. കൂടാതെ യുഎഇയിലെ എണ്ണ ബിസിനസിൽ 100 കോടി രൂപയുടെ നിക്ഷേപം നടത്തിയതായും റിപ്പോർട്ടുണ്ട്. ഭർത്താവ് വിഘ്നേഷ് ശിവനുമായി സഹകരിച്ച് റൗഡി പിക്‌ചേഴ്‌സ് എന്ന നിർമാണ കമ്പനിയും നയൻതാര നടത്തുന്നുണ്ട്. ഈ പ്രൊഡക്ഷൻ ഹൗസിന് 50 കോടി രൂപയുടെ ആസ്തിയുണ്ടെന്നും റിപ്പോർട്ടുകളിൽ പറയുന്നു.
