കിലുക്കം കിലുകിലുക്കം എന്ന സിനിമയിലൂടെ ബാലതാരമായി എത്തി മമ്മൂട്ടി, മോഹന്‍ലാല്‍, രജനീകാന്ത് എന്നീ സൂപ്പര്‍ താരങ്ങളുടേത് ഉള്‍പ്പടെയുള്ള നിരവധി താരങ്ങളുടെ മുപ്പതോളം സിനിമകളില്‍ ശ്രദ്ധേയമായ കഥാപത്രങ്ങള്‍ അവതരിപ്പിച്ച ബാലതാരമായിരുന്നു ബേബി നയന്‍താര.
രജനിയുടെ “കുസേലന്‍’ എന്ന സിനിയിലൂടെ തമിഴ് – തെലുങ്ക് ഭാഷകളിലും ബാല താരമായി അഭിനയിച്ചു. റഹ്മാന്‍റെ “മറുപടി’ യാണ് ഒടുവിലായി അഭിനയിച്ച ചിത്രം.
തുടര്‍ന്ന് പഠനത്തിനായി അഭിനയം താത്ക്കാലികമായി നിര്‍ത്തിയ നയന്‍താര ചക്രവര്‍ത്തി തിരിച്ചു വരവിന് തയാറെടുക്കുകയാണ്. ബേബി നയന്‍താരയായിട്ടല്ല. മിസ്. നയന്‍താരാ ചക്രവര്‍ത്തിയായി നായികയാവാന്‍ .
തമിഴ് – തെലുങ്ക് സിനിമാ വേദിയില്‍ നിന്നും വലിയ ഓഫറുകള്‍ താരത്തെ തേടി എത്തിത്തുടങ്ങി. ഉടന്‍ തന്നെ താന്‍ നായികയാവുന്ന സിനിമകളുടെ പ്രഖ്യാപനങ്ങള്‍ ഉണ്ടാകുമെന്ന് നയന്‍താര അറിയിച്ചു.
ഏപ്രില്‍ 20-ന് തന്‍റെ 19-ാം ജന്മ ദിനം ആഘോഷിച്ചതിനു പിന്നാലെയാണ് നയന്‍താര തിരിച്ചു വരവിന് തയാറെടുക്കുന്ന വിവരം അറിയിച്ചത്.
എറണാകുളം തേവര സേക്രഡ് ഹാര്‍ട്ട് കോളജില്‍ ബിഎ മാസ് കമ്മ്യൂണിക്കേഷന്‍ – ജേര്‍ണലിസം ഫസ്റ്റ് ഇയര്‍ വിദ്യാര്‍ഥിനിയാണിപ്പോള്‍ നയന്‍ താര ചക്രവര്‍ത്തി .
സിനിമയില്‍ നായികയായി ശക്തമായ ഒരു തിരിച്ചു വരവിനുള്ള ഒരുക്കത്തിലാണ് ഈ അഭിനേത്രി. തന്‍റെ പുതിയ ഫോട്ടോകളും നയന്‍താര പുറത്തു വിട്ടിട്ടുണ്ട് .
-സി. കെ. അജയ് കുമാര്‍
