തിരുവനന്തപുരം: മന്ത്രിമാറ്റം സംബന്ധിച്ച എൻസിപിയിലെ ചർച്ചകൾ എങ്ങുമെത്താതെ നീളുന്നു. ഡല്‍ഹിയില്‍ ഇന്ന് ശരദ് പവാറുമായി വീണ്ടും ചർച്ച നടത്തുമെന്ന് കഴിഞ്ഞ ദിവസം അറിയിച്ചിരുന്ന തോമസ് കെ. തോമസ് എംഎല്‍എ ഇന്നു രാവിലെ നാട്ടിലേക്ക് തിരിച്ചു. തോമസ് കെ. തോമസ് ഇന്ന് മുഖ്യമന്ത്രിയെ കണ്ട് മന്ത്രിമാറ്റം സംബന്ധിച്ച് ചർച്ച നടത്തുമെന്നാണ് വിവരം.
കഴിഞ്ഞ ദിവസം ഡല്‍ഹിയിലെ ശരദ് പവാറിന്‍റെ വീട്ടിൽ നടന്ന ചർച്ചയിൽ എല്ലാ കാര്യങ്ങളും ശരദ് പവാറിനെ ബോധിപ്പിച്ചുവെന്നും ഇത് സംബന്ധിച്ച് കത്ത് നല്‍കിയെന്നുമാണ് തോമസ്കെ. തോമസ് അറിയിച്ചത്. എൻസിപിയിലെ മന്ത്രിമാറ്റവുമായി ബന്ധപ്പെട്ട കാര്യങ്ങൾ ചർച്ച ചെയ്യാൻ മുഖ്യമന്ത്രിയുമായി കൂടിക്കാഴ്ച നടത്തുമെന്ന് ഇന്നു രാവിലെ അദ്ദേഹം മാധ്യമങ്ങളോട് പറഞ്ഞു.
എൻസിപി ദേശീയ നേതാവ് ശരത് പവാറുമായി കൂടിക്കാഴ്ച നടത്തിയെന്നും പാർട്ടിയുമായി ബന്ധപ്പെട്ട കാര്യങ്ങൾ അദ്ദേഹം ചോദിക്കുകയും മറുപടി കൊടുക്കുകയും ചെയ്തുവെന്നും തോമസ് പറഞ്ഞു. അനാവശ്യമായ ചർച്ചകളും പരസ്യ പ്രതികരണങ്ങളും വേണ്ടെന്നാണ് പാർട്ടി നിലപാടെന്നും അദ്ദേഹം വ്യക്തമാക്കി.
മന്ത്രിമാറ്റം പാര്‍ട്ടി തീരുമാനമാണെന്നും നാളെ വീണ്ടും അദ്ദേഹത്തെ താന്‍ കാണുമെന്നുമായിരുന്നു തോമസ് ഇന്നലെ പറഞ്ഞിരുന്നത്. എന്നാൽ ശരദ് പവാറിനെ വീണ്ടും കാണാതെ ഇന്നു പുലർച്ചെ നാട്ടിലേക്കു മടങ്ങുകയായിരുന്നു.അതേസമയം ഇന്ന് രാവിലെ മാധ്യമങ്ങളെ കണ്ട മന്ത്രി എ.കെ.ശശീന്ദ്രൻ പാർട്ടിക്ക് മന്ത്രിസഭയിൽ പ്രാതിനിധ്യം ഉണ്ടാവണമെന്ന് മാത്രമാണ് താൻ ആവശ്യപ്പെട്ടതെന്നും തോമസിന് മന്ത്രിയാവുന്നതിന് തന്‍റെ മന്ത്രിസ്ഥാനം തടസമല്ലെന്നും അഭിപ്രായപ്പെട്ടു.
തോമസിനെ കുറ്റപ്പെടുത്തേണ്ട കാര്യമില്ല. അദ്ദേഹം എന്‍സിപിയുടെ ദേശീയ അധ്യക്ഷനെ കാണുന്നതും സംസാരിക്കുന്നതും ഒരു തരത്തിലും അച്ചടക്ക ലംഘനമോ പാര്‍ട്ടി വിരുദ്ധമോ അല്ല. അദ്ദേഹം പാര്‍ട്ടിയുടെ പാര്‍ലമെന്‍ററി പാര്‍ട്ടി നേതാവാണ്. അദ്ദേഹത്തിന് പവാറിനെ കണ്ട് പല കാര്യങ്ങളും സംസാരിക്കാനുണ്ടാവും.
പ്രചരിപ്പിക്കുന്നതുപോലെ ഒരു കാര്യവും എൻസിപിയിൽ നടക്കുന്നില്ല. രണ്ടുമാസം മുമ്പ് ശരദ് പവാറുമായി ചർച്ച നടത്തിയിരുന്നു. അന്ന് മുഖ്യമന്ത്രിയോട് സംസാരിക്കാൻ തീരുമാനിച്ചു. തെരഞ്ഞെടുപ്പ് വന്നതോടെയാണ് ഇക്കാര്യം നീണ്ടുപോയത്. ഇന്നലത്തെ കൂടിക്കാഴ്ചയുടെ വിവരങ്ങൾ തനിക്കറിയില്ല. അസ്വഭാവികമായി ഒന്നും നടന്നിട്ടില്ല.
കേരളത്തിൽ ഇപ്പോളിത് ചർച്ചയാക്കിയത് നല്ല കാര്യമല്ലെന്ന് ബന്ധപ്പെട്ടവർ മനസിലാക്കണം. താൻ രാജി വയ്ക്കുന്നതിൽ ഒരു തടസമില്ല. പി.സി.ചാക്കോ, തോമസ് കെ. തോമസ് എന്നിവർ പവാറുമായി നടത്തിയത് സ്വകാര്യ സംഭാഷണം മാത്രമാണ് – എ.കെ.ശശീന്ദ്രന്‍ പറഞ്ഞു.
എൻസിപിയിലെ മന്ത്രിമാറ്റത്തിൽ മുഖ്യമന്ത്രിക്ക് വിയോജിപ്പുണ്ട്.
പാര്‍ട്ടിക്ക് മന്ത്രി വേണ്ടെന്ന നിലപാട് ദൂരവ്യാപക പ്രത്യാഘാതം ഉണ്ടാക്കും. പാര്‍ട്ടിക്ക് മന്ത്രിസ്ഥാനം നഷ്ടപ്പെടുന്നതിനെ ഉത്കണ്ഠയോടെയാണ് കാണുന്നത്. ഞാന്‍ രാജിവച്ചാല്‍ അത് മുഖ്യമന്ത്രിയുടെ നിലപാടിനെ എതിര്‍ക്കുന്നത് പോലെയാകും. മുഖ്യമന്ത്രിയുടെ നിലപാടിനെ എതിര്‍ക്കുന്ന ഒരു രാഷ്ട്രീയ നിലപാടിലേക്ക് പോകാൻ താൽപര്യമില്ല- മന്ത്രി എ കെ ശശീന്ദ്രന്‍ പറഞ്ഞു.
