പാലക്കാട്: നെന്മാറ ഇരട്ടക്കൊലക്കേസ് പ്രതി പോത്തുണ്ടി തിരുത്തംപാടത്ത് ചെന്താമരയെ (54) ഇന്നു വൈകുന്നേരം നാലിന് ആലത്തൂർ കോടതിയിൽ ഹാജരാക്കും. ജനങ്ങളുടെ പ്രതിഷേധം കണക്കിലെടുത്ത് മജിസ്‌ട്രേറ്റിന്‍റെ വീട്ടില്‍ ഹാജരാക്കാനാണു നീക്കം. അഞ്ചു ദിവസത്തെ കസ്റ്റഡിയില്‍ പോലീസ് ആവശ്യപ്പടും. തെളിവെടുപ്പ് സംബന്ധിച്ച് പോലീസ് സൂചനയൊന്നും നല്‍കുന്നില്ല.
രണ്ടു പേരെ ക്രൂരമായി കൊലപ്പെടുത്തിയ ശേഷം ഒളിവില്‍ പോയ ചെന്താമരയെ രണ്ടു രാത്രിയും രണ്ടു പകലും നീണ്ട പരിശ്രമത്തിനൊടുവിലാണു പോലീസ് പിടികൂടിയത്. പോത്തുണ്ടി വനമേഖലയില്‍ ഒളിവിലായിരുന്ന പ്രതി വീട്ടിലേക്കു ഭക്ഷണം തേടി വരുന്നതിനിടെ ഇന്നലെ രാത്രി പത്തോടെയാണ് കസ്റ്റഡിയിലായത്. ഒട്ടും കുറ്റബോധമില്ലാത്ത ഭാവത്തിലായിരുന്നു ചെന്താമര.
ഡ്രോൺ പറത്തുന്നതും പോലീസും നാട്ടകാരും തെരയുന്നതും കാടിനുള്ളിൽ പതുങ്ങിയിരുന്നു കണ്ടിരുന്നെന്നു ചെന്താമര പോലീസിനോട് പറഞ്ഞു.തന്‍റെ ഭാര്യ, മകൾ, മരുമകൻ ഉൾപ്പെടെ അഞ്ചു പേരെയാണു താന്‍ കൊലപ്പെടുത്താന്‍ ഉദ്ദേശിച്ചിരുന്നതെന്നും അതില്‍ രണ്ടു പേരെ മാത്രമേ ഇപ്പോള്‍ വകവരുത്തിയിട്ടുള്ളൂ എന്നും ഇയാള്‍ പോലീസിനു മൊഴി നല്‍കിയെന്നാണു വിവരം.
സംഭവം നടന്നതിന്‍റെ തലേ ദിവസം സുധാകരനുമായി തർക്കമുണ്ടായിരുന്നു. എന്‍റെ ഭാര്യയെ കൊന്നതിന് കാണിച്ചു തരാം എന്ന് സുധാകരൻ പറഞ്ഞു. ഇതോടെയാണ് സുധാകരനെ കൊല്ലാൻ തീരുമാനിച്ചതെന്നു പ്രതി മൊഴി നൽകി. ഈ തർക്കത്തിൽ സുധാകന്‍റെ അമ്മ ലക്ഷ്മിയും ഇടപ്പെട്ടിരുന്നു.
ഇതോടെയാണ് ലക്ഷ്മിയെയും കൊലപ്പെടുത്താൻ തീരുമാനിച്ചതത്രെ.നെന്മാറ പോലീസ് സ്റ്റേഷനില്‍ എത്തിച്ചതോടെ പ്രതിക്കെതിരേ രോഷപ്രകടവുമായി ജനങ്ങളെത്തി. പ്രതിയെ കാണിക്കണമെന്നാവശ്യപ്പെട്ട് ഒട്ടേറെ പേര്‍ തടിച്ചുകൂടിയതോടെ പോലീസ് സ്റ്റേഷന്‍റെ ഗേറ്റും വാതിലും അടച്ചു. ജനം ഗേറ്റ് തല്ലിത്തകര്‍ത്ത് അകത്തു കയറിയതോടെ പോലീസിനു ലാത്തിവീശേണ്ടി വന്നു. പോലീസ് പെപ്പര്‍ സ്‌പ്രേ പ്രയോഗിച്ചതായി നാട്ടുകാര്‍ പറഞ്ഞു.
ഇന്നലെ രാത്രിതന്നെ പോലീസ് ചെന്താമരയുടെ വൈദ്യപരിശോധന പൂര്‍ത്തിയാക്കിയെന്നു ഡിവൈഎസ്പി എന്‍. മുരളീധരന്‍ അറിയിച്ചു. ക്ഷീണിതനായിരുന്നെങ്കിലും മറ്റ് ആരോഗ്യപ്രശ്‌നങ്ങൾ ഉണ്ടായിരുന്നില്ലെന്നു പോലീസ് പറഞ്ഞു. പ്രതി വിഷം കഴിച്ചിട്ടില്ലെന്നും സ്ഥിരീകരിച്ചു. ചെന്താമരയെ തൂക്കിക്കൊല്ലാതെ ഞങ്ങൾക്ക് മനഃസമാധാനത്തോടെ ജീവിക്കാൻ കഴിയില്ലെന്ന് അറസ്റ്റിന് ശേഷം കൊല്ലപ്പെട്ട സുധാകരന്‍റെ മക്കൾ പ്രതികരിച്ചു.
