കടല വില്‍പനയ്ക്കിടെ പാടിയ ‘കച്ചാ ബദാം’ എന്ന ഗാനത്തിലൂടെ ഇന്ത്യയിലൊട്ടാകെ പ്രശസ്തനായ വ്യക്തിയാണ് പശ്ചിമ ബംഗാള്‍ സ്വദേശി ഭുബന് ബഡ്യാകര്‍.
പാട്ട് വൈറലായതിനു പിന്നാലെ ഇന്‍സ്റ്റഗ്രാം റീലുകളിലൂടെയും മറ്റും നിരവധിപേരാണ് ഭുബന്റെ ഗാനത്തിന് ചുവടുവെച്ചതും വെച്ചുകൊണ്ടിരിക്കുന്നതും.
അതിനിടെ ഇക്കഴിഞ്ഞ ദിവസം ഭൂബന് ഒരു അപകടത്തില്‍ പരിക്കേറ്റിരുന്നു. സ്വദേശമായ ബിര്‍ഭൂമില്‍, പുതുതായി വാങ്ങിയ കാര്‍ ഓടിക്കാന്‍ പരിശീലിക്കുന്നതിനിടെ ആയിരുന്നു അപകടം.
കാര്‍ നിയന്ത്രണംവിട്ട് മതിലില്‍ ഇടിക്കുകയായിരുന്നു. തുടര്‍ന്ന് ഭുബന് മുഖത്ത് പരിക്കേല്‍ക്കുകയും ചെയ്തു.
പരിക്കില്‍നിന്ന് മോചിതനായതിന് പിന്നാലെ അപകടത്തെ കുറിച്ചുള്ള ഗാനവുമായി എത്തിയിരിക്കുകയാണ് ഭുബന്. അമര്‍ നോതുന്‍ ഗാരി(എന്റെ പുതിയ വണ്ടി) എന്നാണ് ഗാനത്തിന്റെ പേര്.
സെക്കന്‍ഡ് ഹാന്‍ഡ് കാര്‍ വാങ്ങിയതിനെ കുറിച്ചും ഡ്രൈവിംഗ് പഠിക്കുന്നതിനിടെ മതിലില്‍ ഇടിച്ചതിനെ കുറിച്ചുമാണ് പുതിയഗാനത്തില്‍ ഭുബന് പറയുന്നത്.
ഭുബന്റെ പുതിയഗാനം ഇതിനോടകം സാമൂഹികമാധ്യമങ്ങളില്‍ ശ്രദ്ധ നേടിയിട്ടുണ്ട്. ഇതും കച്ചാ ബദാം പോലെ ഹിറ്റാവുമോയെന്നാണ് ആളുകളുടെ ആകാംക്ഷ.
