പാരീസ്: പാരീ സാന്‍ ഷെര്‍മയിന്‍റെ ബ്രസീല്‍ മുന്നേറ്റതാരം നെയ്മറെ ചുറ്റിപ്പറ്റിയുള്ള എല്ലാ അഭ്യൂഹങ്ങളും അവസാനിച്ചു. നെയ്മര്‍ പാരീസ് വിടില്ല. പിഎസ്ജിയുമായി നെയ്മര്‍ 2025 വരെയുള്ള പുതിയ കരാറില്‍ ഒപ്പുവച്ചു.
അടുത്ത സീസണിൽ നെയ്മർ ബാഴ്സലോണയിൽ തിരിച്ചെത്തുമെന്ന് റിപ്പോർട്ടുകൾ നേരത്തേ വന്നിരുന്നു. 2017ല്‍ പിഎസ്ജി നെയ്മറെ 27 കോടി ഡോളറിന്‍റെ റിക്കാര്‍ഡ് തുകയ്ക്ക് ബാഴ്‌സലോണയില്‍നിന്നു സ്വന്തമാക്കുകയായിരുന്നു.
2019 മുതല്‍ നെയ്മര്‍ പിഎസ്ജി വിടുമെന്നും തിരിച്ച് ബാഴ്‌സലോണയില്‍ ചേരുമെന്നും വാര്‍ത്തകള്‍ വന്നു തുടങ്ങിയിരുന്നു. എന്നാല്‍ ഈ വാര്‍ത്തകളെല്ലാം അവസാനിപ്പിച്ചുകൊണ്ടാണു നെയ്മര്‍ പുതിയ കരാറില്‍ ഒപ്പുവച്ചത്. പിഎസ്ജിയില്‍ താന്‍ തൃപ്തനാണെന്നു താരം വ്യക്തമാക്കി.
Powered by Streamlyn
നെയ്മറെ എത്തിച്ചെങ്കിലും പിഎസ്ജിക്ക് യുവേഫ ചാമ്പ്യന്‍സ് ലീഗ് കിരീടം നേടാനായിട്ടില്ല. കഴിഞ്ഞ സീസണില്‍ ക്ലബ് ഫൈനലില്‍ പ്രവേശിച്ചു. ഈ സീസണില്‍ സെമിയില്‍ മാഞ്ചസ്റ്റര്‍ സിറ്റിയോടു തോറ്റു.
പിഎസ്ജിക്കായി നെയ്മര്‍ 112 മത്സരങ്ങളില്‍നിന്ന് 85 ഗോള്‍ നേടി. മൂന്നു ലീഗ് ട്രോഫി ഉള്‍പ്പെടെ ഒന്പത് കിരീടങ്ങളിലും താരം പങ്കാളിയായി.
