തലശേരി: ബിജെപി പ്രവര്‍ത്തകനും ലോറി ക്ലീനറുമായിരുന്ന വടക്കുമ്പാട് പാറക്കെട്ടിലെ മാലയാട്ട് നിഖിലി (23) നെ വെട്ടിക്കൊലപ്പെടുത്തിയ കേസില്‍ കുറ്റക്കാരെന്ന് കണ്ടെത്തിയ അഞ്ചു പ്രതികൾക്കും തലശേരി അഡീഷണല്‍ ജില്ലാ സെഷന്‍സ് കോടതി ജീവപര്യന്തം തടവും 50,000 രൂപ വീതം പിഴയടയ്ക്കാനും ശിക്ഷിച്ചു.
സിപിഎം പ്രവര്‍ത്തകരായ എരഞ്ഞോളി വടക്കുമ്പാട് തെക്കേ കണ്ണോളി വീട്ടില്‍ ശ്രീജിത്ത് (39), വടക്കുമ്പാട് ഗുംട്ടി ചാലില്‍ വീട്ടില്‍ വിനോയ് (31), എരഞ്ഞോളി റസീന മന്‍സിലില്‍ കെ.പി. മനാഫ് (40), എരഞ്ഞോളി ജയരാജ് ഭവനില്‍ സുനില്‍കുമാര്‍ (50), നിട്ടൂര്‍ കളത്തില്‍ വീട്ടില്‍ മര്‍സൂഖ് (33) എന്നിവരെയാണ് കോടതി ശിക്ഷിച്ചത്. പിഴയടച്ചില്ലെങ്കിൽ ഇവർ ഒരുവർഷം കൂടി തടവ് അനുഭവിക്കണം.
ബിജെപി നേതാവ് എം.പി. സുമേശിനെ തലശേരി പുതിയ ബസ്‌സ്റ്റാൻഡിലെ നാരാങ്ങാപ്പുറത്തു വച്ച് വെട്ടിപ്പരിക്കേല്‍പ്പിച്ചതിന്‍റെ തുടര്‍ച്ചയായി നടന്ന കൊലപാതകപരമ്പരയിലാണ് നിഖില്‍ കൊല്ലപ്പെട്ടത്. ലോറിയില്‍ വരികയായിരുന്ന നിഖിലിനെ കൂളി ബസാറില്‍ വച്ച് രണ്ടു ബൈക്കുകളിലെത്തിയ അക്രമിസംഘം ലോറി തടഞ്ഞുനിര്‍ത്തുകയും ഓടിരക്ഷപ്പെടാന്‍ ശ്രമിച്ച നിഖിലിനെ പിന്തുടര്‍ന്ന് ഒരു വീടിനുപിന്നിലിട്ട് വെട്ടിക്കൊലപ്പെടുത്തുകയുമായിരുന്നു.
കേസിൽ നാലാംപ്രതി നിട്ടൂര്‍ ഉമ്മാലില്‍ യു. ഫിറോസ് (36),ഏഴാംപ്രതി എരഞ്ഞോളി നടുവോതിയില്‍ വല്‍സന്‍ എന്ന വല്‍സന്‍ വയനാന്‍ (55) എന്നിവരെ കുറ്റക്കാരല്ലെന്നു കണ്ട് കഴിഞ്ഞദിവസം കോടതി വെറുതെ വിട്ടിരുന്നു.എട്ടാം പ്രതി പാറക്കെട്ടിലെ മൂലന്‍ ശശിധരന്‍ സംഭവത്തിനുശേഷം മരണമടഞ്ഞു.
കേസില്‍ വിസ്തരിച്ച 44 സാക്ഷികളില്‍ ദൃക്സാക്ഷികളുള്‍പ്പെടെ13 പേർ കൂറുമാറിയിരുന്നു. വിദേശത്തുണ്ടായിരുന്ന രണ്ടാംസാക്ഷി നിട്ടൂര്‍ കൈതേരിപറമ്പത്ത് ലിഷിന്‍ നാട്ടില്‍ തിരിച്ചെത്തുകയും കോടതിയിലെത്തി മൊഴി നല്‍കുകയും ചെയ്തു. നിഖില്‍ ക്ലീനറായിരുന്ന ലോറിയുടെ ഡ്രൈവറുള്‍പ്പെടെയുള്ള സാക്ഷികളാണ് കൂറുമാറിയതായി പ്രോസിക്യൂഷന് വിചാരണവേളയില്‍ പ്രഖ്യാപിച്ചിരുന്നത്.
സംഭവസമയത്ത് ധര്‍മടം പോലീസ് സ്റ്റേഷനിലെ എസ്എച്ച്ഒ ആയിരുന്ന ഐപിഎസ് ട്രെയിനി ജെ.വി.എന്‍. സുബ്രഹ്മണ്യന്‍റെ പരാതിപ്രകാരം പോലീസ് സ്വമേധയായാണ് കേസ് രജിസ്റ്റര്‍ ചെയ്തത്. 67 രേഖകളും ആയുധങ്ങളും ഉള്‍പ്പെടെ 16 തൊണ്ടിമുതലുകളും പ്രോസിക്യൂഷന് കോടതിയില്‍ ഹാജരാക്കിയിരുന്നു.
65 സാക്ഷികളാണ് കേസിലുണ്ടായിരുന്നത്.അന്വേഷണ ഉദ്യോഗസ്ഥരായിരുന്ന ഡിവൈഎസ്പിമാരായ യു.പ്രേമന്‍, എം.വി. സുകുമാരന്‍, സിഐ പി.ജെ.രാജു, ഐഡിയ സെല്ലുലാര്‍ നോഡല്‍ ഓഫീസര്‍ അഗസ്റ്റിന്‍ ജോസഫ് തുടങ്ങി 44 സാക്ഷികളെയാണ് വിസ്തരിച്ചു. പ്രോസിക്യൂഷനുവേണ്ടി അഡീഷണല്‍ പബ്ലിക് പ്രോസിക്യൂട്ടര് വി.ജെ.മാത്യു ഹാജരായി.
