കോട്ടയം: തനിക്ക് അർബുദ രോഗമുണ്ടെന്ന് തിരിച്ചറിഞ്ഞെന്നും ശസ്ത്രക്രിയയ്ക്ക് വിധേയയായെന്നും വ്യക്തമാക്കി കേരള കോണ്‍ഗ്രസ്-എം ചെയര്‍മാന്‍ ജോസ് കെ. മാണിയുടെ ഭാര്യയും സാമൂഹിക പ്രവർത്തകയുമായ നിഷ ജോസ്. സമൂഹ മാധ്യമത്തിലൂടെ പങ്കുവച്ച വീഡിയോയയിലാണ് ഇക്കാര്യം വെളിപ്പെടുത്തിയത്.
കാന്‍സറിനെ തോല്‍പ്പിക്കുമെന്ന ഉറച്ച ആത്മവിശ്വാസം ഉണ്ടെന്നും കാന്‍സറിനെ കീഴടക്കിയിട്ടേയുള്ളൂ കാര്യമുള്ളുവെന്നും നിഷ വീഡിയോയില്‍ പറയുന്നു. കഴിഞ്ഞ പത്തു വര്‍ഷത്തിലേറെയായി കാന്‍സര്‍ രോഗികളുടെ ഉന്നമനത്തിനും പുനരധിവാസത്തിനുമായി പ്രവര്‍ത്തിച്ചുവരികയാണ് നിഷ.
കാന്‍സര്‍ രോഗികള്‍ക്ക് ബോധവത്കരണം നടത്തുന്നതിലും മുടി മുറിച്ചു നല്‍കുന്നതിലുമൊക്കെ സജീവയായിരുന്നു. ഹെയര്‍ ഫോര്‍ ഹോപ്പ് ഇന്ത്യ കാമ്പയിന്‍റെ ബ്രാന്‍ഡ് അംബാസിഡറുമായിരുന്നു.
എല്ലാ വര്‍ഷവും പതിവായി ചെയ്യുന്ന മാമോഗ്രാം പരിശോധനയിലാണ് സ്തനാര്‍ബുദം കണ്ടെത്തിയതെന്നും കുടുംബത്തിന്‍റെ പിന്തുണയും ശക്തിയും അര്‍ബുദത്തെ പ്രതിരോധിക്കാനുള്ള പ്രചോദനമായെന്നും നിഷ പറയുന്നു.
