തിരുവനന്തപുരം: ഗവർണർ പെട്ടെന്നു വന്നശേഷം വാണംവിട്ടപോലെ പോയെന്ന് പ്രതിപക്ഷ ഉപനേതാവ് പി.കെ. കുഞ്ഞാലിക്കുട്ടി. തങ്ങളൊക്കെ ഇരിക്കുന്ന ഭാഗത്തേക്ക് വരിക പോലും ചെയ്തില്ലെന്നും അദ്ദേഹം വ്യക്തമാക്കി.
നിയമസഭയിൽ ഗവർണർ ആരിഫ് മുഹമ്മദ് ഖാൻ നയപ്രഖ്യാപന പ്രസംഗം പെട്ടെന്ന് അവസാനിപ്പിച്ചതിനോട് പ്രതികരിക്കുകയായിരുന്നു പി.കെ.കുഞ്ഞാലിക്കുട്ടി.
പതിനഞ്ചാം കേരള നിയമസഭയുടെ പത്താം സമ്മേളനത്തിനാണ് ഇന്നു തുടക്കമായത്. ബജറ്റ് സമ്മേളനത്തിനു തുടക്കം കുറിച്ചുകൊണ്ടുള്ള നിയമസഭയിലെ ഗവർണറുടെ നയപ്രഖ്യാപന പ്രസംഗത്തിനിടെ അന്പരപ്പിക്കുന്ന നാടകീയരംഗങ്ങൾ.
സഭയിലെത്തിയ ഗവർണർ ആരിഫ് മുഹമ്മദ് ഖാൻ ഒരു മിനിറ്റ് 17 സെക്കൻഡിനുള്ളിൽ നയപ്രഖ്യാപന പ്രസംഗത്തിന്‍റെ അവസാന ഖണ്ഡിക മാത്രം വായിച്ചശേഷം പെട്ടെന്നുതന്നെ സഭ വിട്ടു.
