ഫോണില്‍ ഇന്റര്‍നെറ്റ് കണക്ഷനില്ലാതെ തന്നെ ഇനി മുതല്‍ കമ്പ്യൂട്ടറില്‍ വാട്‌സ് ആപ്പ് വെബ് വേര്‍ഷന്‍ ഉപയോഗിക്കാം.ഉപയോക്താക്കളുടെ ദീര്‍ഘ നാളത്തെ ആവശ്യം നിറവേറ്റുന്ന പുത്തന്‍ ഫീച്ചര്‍ അവതരിപ്പിച്ചിരിക്കുകയാണ് കമ്പനി.
ഫോണില്‍ ഇന്റര്‍നെറ്റ് കണക്ഷനുള്ളപ്പോള്‍ മാത്രമേ ഇതുവരെ വാട്‌സ് ആപ്പ് വെബ് പ്രവര്‍ത്തിപ്പിക്കാന്‍ സാധിച്ചിരുന്നുള്ളൂ. മള്‍ട്ടി- ഡിവൈസ് സപ്പോര്‍ട്ടിലൂടെയാണ് ഈ പ്രതിസന്ധി പരിഹരിക്കപ്പെടുന്നത്.
പരീക്ഷണ ഘട്ടമെന്ന നിലയില്‍ ബീറ്റ ടെസ്റ്റിങ് പ്രോഗ്രാം വഴിയാകും പുതിയ ഫീച്ചര്‍ ഉപയോക്താക്കള്‍ക്ക് നല്‍കിത്തുടങ്ങുക. ആന്‍ഡ്രോയ്ഡ്, ഐ.ഒ.എസ് പ്ലാറ്റ്‌ഫോമുകളില്‍ വാട്‌സ്ആപ്പ് ബീറ്റ വേര്‍ഷന്‍ ഉപയോഗിക്കുന്നവര്‍ക്ക് വൈകാതെ അപ്‌ഡേറ്റിലൂടെ ഈ സൗകര്യം ലഭ്യമാകും.
വാട്‌സ്ആപ്പുമായി ബന്ധപ്പെട്ട ഏറ്റവും പുതിയ വിവരങ്ങളും അപ്‌ഡേറ്റുകളും നല്‍കുന്ന WABetaInfoയുടെ ബ്ലോഗ്‌പോസ്റ്റിലാണ് ഇക്കാര്യം പുറത്തുവിട്ടത്.
ബീറ്റ പ്രോഗ്രാമില്‍ ചേരുന്നവര്‍ക്ക് നാല് ഡെസ്‌ക്‌ടോപ്പ് ഡിവൈസുകളില്‍ ഒരേസമയം അവരുടെ വാട്‌സ് ആപ്പ് പ്രവര്‍ത്തിപ്പിക്കാം. എന്നാല്‍, മറ്റൊരാളുമായി ചാറ്റ് ചെയ്യാനോ കോള്‍ ചെയ്യാനോ സാധിക്കണമെങ്കില്‍ അവരും വാട്‌സ് ആപ്പ് അപ്‌ഡേറ്റ് ചെയ്യേണ്ടതായി വരും.
നിലവില്‍ ലക്ഷക്കണക്കിന് വരുന്ന ബീറ്റ ടെസ്റ്റര്‍മാരുണ്ടെങ്കിലും അവരില്‍ ചുരുക്കം ചിലര്‍ക്ക് മാത്രമേ ബീറ്റ പ്രോഗ്രാം ലഭ്യമാക്കുന്നുള്ളൂ.
വരും ദിവസങ്ങളില്‍ കൂടുതല്‍ പേരിലേക്ക് പുതിയ വെബ് സവിശേഷതകള്‍ അടക്കമുള്ള അപ്‌ഡേറ്റ് എത്തുമെന്നാണ് റിപ്പോര്‍ട്ട്. വാട്‌സ്ആപ്പ് ബിസിനസ് ആപ്പിനും സമാന ഫീച്ചര്‍ നല്‍കിയിട്ടുണ്ട്. വലിയൊരു വിഭാഗം ആളുകള്‍ക്ക് ആശ്വാസമാകുന്നതാണ് പുതിയ വാര്‍ത്ത.
