ലോകത്തിലെ ഏറ്റവും കൂടുതൽ നീളമുള്ള നൂഡിൽസ് നിർമിച്ചതിനുള്ള ഗിന്നസ് ലോക റിക്കാർഡ് ചൈന സ്വന്തമാക്കി. കൈ ഉപയോഗിച്ച് നിർമിച്ച ഈ നൂഡിൽസിന്‍റെ നീളം 10,100 അടിയിൽ അധികമാണ്. നാൽപ്പത് കിലോഗ്രാം ഗോതന്പ് മാവ്, 26.8 ലിറ്റർ വെള്ളം 0.6 ഗ്രാം ഉപ്പ് എന്നിവയുപയോഗിച്ച് നിർമിച്ചിരിക്കുന്ന നൂഡിൽസിന് 66 കിലോയിലധികം ഭാരമാണുള്ളത്. സെൻട്രൽ ചൈനയിലെ ഹെനാൻ പ്രവശ്യയിൽ പതിനേഴു മണിക്കൂർ നീണ്ട പരിശ്രമത്തിനു ശേഷമാണ് ഒരു കൂട്ടം പാചകക്കാർ ഈ നൂഡിൽസ് നിർമിച്ചത്.
2001ൽ ജപ്പാനിൽ നിർമിച്ച 1,800 അടി നീളമുള്ള നൂഡിൽസിന്‍റെ റിക്കാർഡാണ് ചൈന പഴങ്കഥയാക്കിയത്. ചൈനയിൽ ആഘോഷിക്കുന്ന പൊതു അവധി ദിനമായ സീനിയേഴ്സ് ഡേയിലാണ് നൂഡിൽസ് നിർമിച്ചത്. ചൈനയിൽ ദീർഘായുസിന്‍റെ പ്രതീകമാണ് നൂഡിൽസ്.
