വിഖ്യാത നടന്‍ ഓംപുരിയുടെ മരണത്തെച്ചൊല്ലി പാക്കിസ്ഥാനിലെ ബോല്‍ ടിവിയില്‍ നടക്കുന്ന അന്വേഷണ പരമ്പര വെളിപ്പെടുത്തുന്ന കാര്യങ്ങള്‍ ഏവരെയും ഞെട്ടിക്കാന്‍ പോന്നതാണ്. പ്രധാനമന്ത്രി നരേന്ദ്ര മോദിയും സുരക്ഷാ ഉപദേഷ്ടാവ് അജിത് ഡോവലും ചേര്‍ന്ന് ഗൂഢാലോചന നടത്തി ഓംപുരിയെ ക്രൂരമായി കൊലപ്പെടുത്തുകയായിരുന്നുവെന്നാണ് പാക് ചാനലിന്റെ ഏറ്റവും പുതിയ കണ്ടെത്തല്‍.
എന്തുകൊണ്ട് ഓംപുരിയെ ഇല്ലായ്മ ചെയ്യാന്‍ മോദിയും ഡോവലും തീരുമാനിച്ചു എന്നതിനുള്ള ഉത്തരവും ഇവര്‍ കണ്ടെത്തിയിട്ടുണ്ട്. ഉറി ഭീകരാക്രമണത്തെ തുടര്‍ന്ന് പാക്കിസ്ഥാന്‍ കലാകാരന്മാര്‍ക്ക് ഇന്ത്യയില്‍ വിലക്കേര്‍പ്പെടുത്തിയ സമയത്ത് കലാകാരന്മാര്‍ക്കനുകൂലമായി ഓംപുരി സംസാരിച്ചു എന്നതാണ് ഇതില്‍ പ്രധാനം. കൂടാതെ ഓംപുരി ദേശസുരക്ഷയ്ക്ക് വലിയ വെല്ലുവിളിയും ആയിരുന്നത്രേ.
കേട്ടാല്‍ ചിരി വരുന്ന തരത്തിലുള്ള കണ്ടെത്തലുകള്‍ ഇനിയുമുണ്ട്. അടുത്തിടെ ഓംപുരിയെ ദോവല്‍ തന്റെ വീട്ടിലേക്ക് വിളിച്ചുവരുത്തിയെന്നാണ് മറ്റൊരു കണ്ടെത്തല്‍. അവിടെവച്ച് ഓംപുരി ക്രൂരമായ മര്‍ദനത്തിന് ഇരയായി. വിവസ്ത്രനാക്കപ്പെട്ടു. ഉറിയില്‍ വീരമൃത്യുവരിച്ച നിതിന്‍ യാദവിന്റെ ഗ്രാമത്തിലേക്ക് പോയി അദ്ദേഹത്തെക്കുറിച്ച് ഓംപുരി നടത്തിയ അപകീര്‍ത്തികരങ്ങളായ വാക്കുകള്‍ക്ക് മാപ്പുചോദിക്കാനും ദോവല്‍ ഉത്തരവിട്ടെന്നും ചാനല്‍ പറയുന്നു.
മരണസമയത്ത് ഓംപുരിയുടെ ശരീരത്തില്‍ മര്‍ദ്ദനമേറ്റതിന്റെ പാടുകളും കൊലയാളിയുടെ ശരീരത്തില്‍ നിന്നുണ്ടായ പാടുകളും ഉണ്ടായിരുന്നു എന്നും നിര്‍ബന്ധിച്ച് മദ്യം നല്‍കി മയക്കിയ ശേഷം തലയിണ ഉപയോഗിച്ച് ശ്വാസം മുട്ടിച്ച് കൊലപ്പെടുത്തുകയായിരുന്നു എന്നുമാണ് ഇവര്‍ വാദിക്കുന്നത്. ഇതെല്ലാം വിശദീകരിക്കുന്ന പോസ്റ്റ്‌മോര്‍ട്ടം റിപ്പോര്‍ട്ടും ചാനല്‍ പുറത്തുവിട്ടിട്ടുണ്ട്. മോദിയുടെ നിര്‍ദേശ പ്രകാരം ഡോവല്‍ ഏര്‍പ്പാടാക്കിയ വാടകക്കൊലയാളിയാണത്രേ കൃത്യം നടത്തിയത്.
മോദിയുടെയും ഡോവലിന്റെയും അടുത്ത ലക്ഷ്യങ്ങള്‍ ഫവദ് ഖാനും സല്‍മാന്‍ ഖാനുമാണെന്നും ബോല്‍ ടിവി വെളിപ്പെടുത്തുന്നു. രണ്ടുപേരും സൂക്ഷിച്ചിരിക്കണമെന്ന മുന്നറിയിപ്പും ചാനല്‍ നല്‍കുന്നു. ഏതായാലും പാക്ക് ചാനലിന്റെ ഈ കണ്ടെത്തലുകള്‍ വായിക്കുന്നവര്‍ക്ക് തോന്നുന്ന സംശയം, ഇത് ഒരു വാര്‍ത്താ ചാനലോ അതോ ചാനലിലെ കോമഡി ഷോയോ? എന്നതാണ്.
https://youtu.be/rNO5rRBJJuI
