തിരുവനന്തപുരം: കേരളത്തില്‍ ഇന്നും നാളെയും മദ്യവില്‍പ്പന ഉണ്ടാകില്ല. ഇന്ന് സംസ്ഥാനത്ത് ശ്രീനാരായണ ജയന്തി ദിനം ആചരിക്കുന്നതിനാലും നാളെ ഒന്നാം തീയതി ആയതിനാലും തുടർlച്ചയായി രണ്ട് ദിവസം മദ്യശാലകള്‍ പ്രവര്‍ത്തിക്കില്ല.
അതേസമയം ഇന്നലെ വരെ കഴിഞ്ഞ പത്ത് ദിവസം കൊണ്ട് 757 കോടിയുടെ മദ്യമാണ് ബെവ്കോ ഔട്ട്‌ലെറ്റുകളിൽ നിന്നും വിറ്റഴിച്ചത്. കഴിഞ്ഞ വര്‍ഷം 700 കോടിയുടെ മദ്യമാണ് ഇക്കാലയളവിൽ വിറ്റത്.
ഉത്രാടം വരെയുള്ള എട്ട് ദിവസങ്ങളിലായി 665 കോടി രൂപയുടെ മദ്യവില്‍പ്പനയാണ് സംസ്ഥാനത്ത് നടന്നത്. ഈ മാസം 21 മുതൽ 28 വരെയുള്ള കണക്കാണിത്.
കഴിഞ്ഞവർഷം ഇത് 624 കോടി രൂപയായിരുന്നു. കഴിഞ്ഞ വർഷത്തെ അപേക്ഷിച്ച് 41 കോടി രൂപയുടെ അധിക വില്‍പ്പനയാണ് ഉത്രാടം വരെ നടന്നത്.
ഉത്രാട ദിനത്തിൽ മാത്രം സംസ്ഥാനത്ത് 116 കോടി രൂപയുടെ മദ്യമാണ് ബെവ്കോ ഔട്ട്‌ലെറ്റ്് വഴി വിറ്റത്. കഴിഞ്ഞ വര്‍ഷം ഓണക്കാലത്തെ വില്‍പ്പന 700.6 കോടിയായിരുന്നു.
പത്ത് ദിവസത്തിനിടെ ഏറ്റവും കൂടുതല്‍ വിറ്റഴിഞ്ഞത് ജവാന്‍ എന്ന ബ്രാന്‍ഡാണ്. ആറ് ലക്ഷത്തി മുപ്പതിനായിരം ലിറ്റര്‍ ജവാനാണ് വിറ്റൊഴിഞ്ഞത്.
പ്രത്യേകിച്ചൊരു ബ്രാന്‍ഡും ഉപഭോക്താവ് ആവശ്യപ്പെട്ടില്ലെങ്കില്‍ സര്‍ക്കാരിന്‍റെ സ്വന്തം ബ്രാന്‍ഡായ ജവാന്‍ റം നല്‍കണമെന്നായിരുന്നു മാനേജര്‍മാര്‍ക്കുള്ള നിര്‍ദേശം.
