കോട്ടയം: സപ്ലൈകോയുടെ ഓണച്ചന്തയ്ക്കു നാളെ തുടക്കമാവും. കോട്ടയം പഴയ പോലീസ് സ്റ്റേഷൻ മൈതാനത്ത് 24 വരെ നടക്കുന്ന ഓണം മെഗാ ഫെയറിൽ സപ്ലൈകോയ്ക്കൊപ്പം കുടുബശ്രീ, വനശ്രീ, മത്സ്യഫെഡ് എന്നിവരും പങ്കെടുക്കും. തിരക്ക് കുറയ്ക്കാൻ എട്ട് കൗണ്ടറുകളുമാണ് ഏർപ്പെടുത്തിയിരിക്കുന്നത്. ജില്ലാ ഫെയറിൽ കുടുംബശ്രീ നാടൻ വിഭവങ്ങളുടെ ഫുഡ് കോർട്ടുമുണ്ട്.
താലൂക്കുതല ഓണം ഫെയർ 16 മുതൽ 24 വരെയായിരിക്കും. കോട്ടയം താലൂക്ക് തല ഫെയർ ഏറ്റുമാനൂർ സപ്ലൈകോ സൂപ്പർമാർട്ടിലും പാലായിലേത് മീനച്ചിൽ സൂപ്പർമാർട്ടിലും കാഞ്ഞിരപ്പള്ളിയിലേത് പൊൻകുന്നം സൂപ്പർമാർട്ടിലും വൈക്കത്തേത് വൈക്കം സൂപ്പർ മാർട്ടിലും ചങ്ങനാശേരിയിലേത് പെരുന്ന ഗവണ്‍മെന്‍റ് എൽപിഎസ് മൈതാനത്തുമായിരിക്കും. കോട്ടയത്ത് ജില്ലാ ഫെയർ ഉള്ളതിനാൽ താലൂക്ക് തല മാർക്കറ്റില്ല.
എല്ലാ നിയോജകമണ്ഡലങ്ങളിലും ഓരോ ഓണച്ചന്തകൾ 20 മുതൽ 24 വരെയായിരിക്കും. പുതുപ്പള്ളി, ഈരാറ്റുപേട്ട, കടുത്തുരുത്തി സൂപ്പർമാർട്ടുകൾക്കു പുറമെ മുണ്ടക്കയം പീപ്പിൾ ബസാർ, കറുകച്ചാൽ സൂപ്പർ ബസാർ എന്നിവിടങ്ങളിൽ ഓണച്ചന്ത പ്രവർത്തിക്കും. താലൂക്ക് ആസ്ഥാനമുള്ള നിയോജകമണ്ഡലങ്ങളില്ലാത്തിടത്തു മാത്രമാണ് ഈ സൗകര്യം. വാഴൂർ നിയോജകണ്ഡലം ഇല്ലാതായെങ്കിലും കറുകച്ചാലിൽ പ്രത്യേകം ഫെയർ നടത്തും.
പഞ്ചായത്ത് തലത്തിൽ സപ്ലെകോയുടെ എല്ലാ ഒൗട്ട്‌ലെറ്റുകളിലും മിനി ഓണം ഫെയർ 20 മുതൽ 24 വരെയുണ്ടായിരിക്കും. സപ്ലൈകോ ഒൗട്ട്‌ലെറ്റില്ലാത്ത മുത്തോലി പഞ്ചായത്തിൽ പഞ്ചായത്ത് സൗകര്യം ലഭ്യമാക്കിയാൽ അവിടെയും മിനി ഫെയർ ക്രമീകരിക്കും. എല്ലാ ഉത്പന്നങ്ങളും പുറം മാർക്കറ്റിനെക്കാൾ വില കുറച്ചാണു വില്ക്കുന്നത് ഗുണമേൻമയും ഉറപ്പാക്കിയിട്ടുണ്ടെന്നു അധികൃതർ അറിയിച്ചു.
തിരുനക്കര പഴയ പോലീസ് സ്റ്റേഷൻ മൈതാനത്ത് നടക്കുന്ന ജില്ലാതല ഓണം ഫെയറിന്‍റെ ഉദ്ഘാടനം നാളെ വൈകുന്നേരം ആറിനു മന്ത്രി പി. തിലോത്തമൻ നിർവഹിക്കും. തിരുവഞ്ചൂർ രാധാകൃഷ്ണൻ എംഎൽഎ അധ്യക്ഷത വഹിക്കും. ജില്ലാ പഞ്ചായത്ത് പ്രസിഡന്‍റ് സണ്ണി പാന്പാടി ആദ്യവില്പന നിർവഹിക്കും.
പ്രവർത്തനസമയം
ജില്ലാ, താലൂക്ക് തല ചന്തകൾ – രാവിലെ 9.30 – രാത്രി 8 വരെ
സപ്ലൈകോ ഒൗട്ട‌്‌ലെറ്റ് മിനി ഫെയർ – രാവിലെ 9.30 – രാത്രി 7.30
പച്ചക്കറി
ഹോർട്ടികോർപ്, വിഎഫ്സികെ എന്നിവയുടെ സഹകരണത്തോടെ മിതമായ നിരക്കിൽ പച്ചക്കറി വിൽക്കും. ചേന, ചേന്പ്, കിഴങ്ങ്, വാഴക്കുല ഇനങ്ങളുമുണ്ടായിരിക്കും.
ഗിഫ്റ്റ് കൂപ്പണ്‍
സ്ഥാപനങ്ങൾക്ക് ഓണസമ്മാനമായി നൽകാൻ 2000, 1000 രൂപ നിരക്കുകളിൽ ഗിഫ്റ്റ് കൂപ്പണുകൾ. ഈ കൂപ്പണുകൾകൊണ്ട് സപ്ലൈകോയുടെ ഏതു സ്ഥലത്തെയും ഓണം ഫെയറിൽനിന്ന് ഷോപ്പിംഗ് നടത്താം.
സ്പെഷൽ കൂപ്പണ്‍
എല്ലാ ഒൗട്ട്‌ലെറ്റുകളിലും 950 രൂപ നിരക്കിൽ 18 ഇനം സാധനങ്ങളുടെ കൂപ്പണ്‍ ലഭിക്കും. ഈ സാധനങ്ങൾ പ്രത്യേകം ബിഗ് ഷോപ്പർ കിറ്റിൽ ലഭിക്കും. കൂടുതൽ കൂപ്പണുകൾ വാങ്ങുന്ന സ്ഥാപനങ്ങളിൽ കിറ്റ് എത്തിച്ചുകൊടുക്കും.
