തിരുവനന്തപുരം: ഇന്ത്യ ആതിഥേയത്വം വഹിക്കുന്ന 2023 ഏകദിന ലോകകപ്പിൽ കിരീടസാധ്യതയിൽ മുന്നിൽ നില്ക്കുന്ന ടീമുകൾ ഇന്ത്യയും ഓസ്ട്രേലിയയുമെന്ന് മുൻ ഓസ്ട്രേലിയൻ ക്രിക്കറ്റ് താരം ഗ്ലെൻ മഗ്രാത്ത്.
‘ഇന്ത്യൻ ബൗളിംഗിൽ മിന്നും പ്രകടനം നടത്താൻ കഴിവുള്ള താരമാണ് ജസ്പ്രീത് ബുംറ. അസാധാരണമായ വേഗവും വ്യത്യസ്തമായ ബൗളിംഗ് ശൈലിയും ബുംറയുടെ പ്രത്യേകതയാണ്. ബുംറയുടെ പ്രകടനം ലോകകപ്പിൽ ഇന്ത്യക്ക് ഏറെ നിർണായകമാണ്. കേരളം ക്രിക്കറ്റിന് ഏറെ അനുകൂലമായ നാടാണ്.
കൂടുതൽ പ്രതിഭകളെ കണ്ടെത്തി പ്രോത്സാഹിപ്പിക്കേണ്ടതുണ്ട്. അതിനുള്ള ശ്രമങ്ങളാണു കേരള ക്രിക്കറ്റ് അസോസിയേഷന്റെ നേതൃത്വത്തിൽ നടത്തുന്നത്. തിരുവനന്തപുരം കാര്യവട്ടം ഗ്രീൻഫീൽഡ് രാജ്യത്തെതന്നെ മികച്ച സ്റ്റേഡിയങ്ങളിലൊന്നാണ്’- മഗ്രാത്ത് പറഞ്ഞു.
കാര്യവട്ടം സ്പോർട്സ് ഹബ്ബിൽ കെസിഎ സംഘടിപ്പിച്ച ഫാസ്റ്റ് ബൗളേഴ്സ് ക്യാന്പിൽ പങ്കെടുക്കാനെത്തിയതായിരുന്നു ഗ്ലെൻ മഗ്രാത്ത്.
