സ്വന്തം ലേഖകൻ
തൃശൂർ: കുതിച്ചുയർന്ന ഉള്ളിവില കരയിപ്പിക്കുന്പോഴും ഉള്ളിവിലയെ പരിഹസിക്കുന്ന ട്രോളുകൾ ചിരിയുണർത്തുന്നു. പെട്രോളിനും ഡീസലിനും പിന്നാലെ ഉള്ളിയുടേയും സവാളയുടേയും വില കുതിച്ചതോടെ ട്രോളുകളിൽ താരം സവാളയും ഉള്ളിയുമായി.
തമിഴ്നാട്ടിലും ട്രോളുകൾ ഇതുമായി പ്രചരിക്കുന്നുണ്ട്. മല്ലു ട്രോളുകളിൽ വീഡിയോ ഷൂട്ട് ചെയ്താണ് സവാള വില വർധനവിനെ ട്രോൾ ചെയ്തിരിക്കുന്നത്.
അടുക്കളയിൽ പാചകം ചെയ്യുന്ന ഭാര്യ ഇടയ്ക്കു വെച്ച് ഭർത്താവിന്‍റെ അടുത്തെത്തുകയും ഭർത്താവിന്‍റെ കഴുത്തിൽ മാല പോലെ കൊളുത്തിയിട്ടിരിക്കുന്ന താക്കോലെടുക്കാൻ ശ്രമിക്കുകയും ചെയ്യുന്നു. എന്നാൽ ഭർത്താവ് ഞാൻ തുറന്നുതരാമെന്ന് പറഞ്ഞ് വീട്ടിലെ അലമാരയിലെ അറ തുറക്കുന്നു.
വിലപിടിപ്പുള്ള സ്വർണവും മറ്റും സൂക്ഷിക്കുന്ന അലമാരയിലെ അറയ്ക്കുള്ളിൽ സവാളയാണ് സൂക്ഷിച്ചു വെച്ചിരിക്കുന്നത്. മാലയും മറ്റും സൂക്ഷിക്കാറുള്ള ചെറിയ ജ്വല്ലറി ബോക്സും ഭർത്താവ് പതിയെ തുറക്കുന്നതിന്‍റെ ക്ലോസപ് ഷോട്ടാണ് അവസാനം. ആ ജ്വല്ലറി ബോക്സിനുള്ളിൽ മാലയോ കമ്മലോ അല്ല…ചെറിയ ഉള്ളിയാണ് എടുത്തുവെച്ചിരിക്കുന്നത്…
ഉള്ളിവില വർധനവിനെ കളിയാക്കിയും വിമർശിച്ചും ട്രോളുകൾ പ്രചരിക്കുന്പോൾ നേരിയവിലക്കുറവ് വിപണിയിൽ അനുഭവപ്പെടുന്നുണ്ട്.മായാനദിയും ബാഹുബലിയും ദൃശ്യവുമൊക്കെ സവാള വില വർധന ട്രോളിൽ ഇടം പിടിച്ചിട്ടുണ്ട്.
ദൃശ്യത്തിൽ മോഹൻലാൽ ഭാര്യയേയും മക്കളേയും ഉപദേശിക്കുന്ന ട്രോളാണ് വൈറലാകുന്നത്.
അയലത്തെ സുമതി ചേച്ചി വന്ന് തിരിച്ചും മറിച്ചും ചോദിക്കും, ഉള്ളിയുണ്ടോ എന്ന്….എത്ര ചോദിച്ചാലും ഇല്ലന്നെ പറയാവുളളു എന്നാണ് ദൃശ്യത്തിലെ ജോർജുകുട്ടി ഭാര്യയോടും മക്കളോടും പറയുന്നത്.
