വണ്ടിപ്പെരിയാർ: ഒൺലൈൻ റമ്മി കളിയിൽ നഷ്ടമായത് ലക്ഷങ്ങൾ. നഷ്ടം നികത്താൻ ആറു വീടുകളിൽനിന്ന് ഒൻപത് പവൻ സ്വർണം മോഷ്ടിച്ചയാളെ വണ്ടിപ്പെരിയാർ പോലീസ് അറസ്റ്റ് ചെയ്തു.
മഞ്ചുമല പുതുക്കാട് പുതുലയം സ്വദേശി യാക്കോബിനെയാണ് അറസ്റ്റ് ചെയ്തത്. വണ്ടിപ്പെരിയാർ മഞ്ചുമലയിൽ മൂന്നു പവൻ സ്വർണം മോഷണം പോയെന്ന പരാതി കഴിഞ്ഞ ദിവസം വണ്ടിപ്പെരിയാർ പോലീസിനു ലഭിച്ചിരുന്നു.
പോലീസ് നടത്തിയ അന്വേഷണത്തിലാണ് പ്രദേശത്തെ ആറു വീടുകളിൽനിന്നു സ്വർണം മോഷണം പോയതായുള്ള പരാതി ലഭിച്ചത്.
വീടുപണിക്ക് കരുതിയിരുന്ന ഒന്നരലക്ഷം രൂപയോളം ഓൺലൈൻ റമ്മി കളിച്ച് നഷ്ടപ്പെട്ടതോടെ ഈ തുക കണ്ടെത്തുന്നതിനായാണ് മോഷണം നടത്തിയതെന്നു പ്രതി പോലീസിനോട് സമ്മതിച്ചു.
ആളുകൾ പറഞ്ഞതനുസരിച്ച് യാക്കോബിനെ പോലീസ് ചോദ്യം ചെയ്തതോടെയാണ് പ്രതി മോഷണം നടത്തിയതായി കണ്ടെത്തിയത്.
