ചൂടു കൂടിയതോടെ പഴവര്‍ഗങ്ങളുടെ വില്‍പ്പന ഗണ്യമായി ഉയര്‍ന്നിരിക്കുയാണ്. താരതമ്യേന പഴവര്‍ഗങ്ങള്‍ക്ക് ഇപ്പോള്‍ വിപണിയില്‍ വിലകുറവാണ്. ഇതുമൂലം ആളുകള്‍ ധാരാളമായി ആപ്പിളും ഓറഞ്ചുമെല്ലാം വാങ്ങിക്കഴിക്കുകയാണ്. എന്നാല്‍ ഓമല്ലൂര്‍ പഞ്ചായത്തിലെ ചിലര്‍ക്ക് ഓറഞ്ച് കഴിച്ചപ്പോള്‍ അനുഭവപ്പെട്ടത് ഛര്‍ദ്ദിയും ജലദോഷവുമായിരുന്നു.
ഓമല്ലൂര്‍ കൈപ്പട്ടൂര്‍ റോഡില്‍ കച്ചവടം നടത്തിയവരില്‍ നിന്ന് ഓറഞ്ച് വാങ്ങി കഴിച്ചവര്‍ക്കാണ് ഛര്‍ദ്ദിയും ജലദോഷവും അനുഭവപ്പെട്ടത്. ഇതേത്തുടര്‍ന്ന് പഞ്ചായത്ത് അധികൃതരുടെ നേതൃത്വത്തില്‍ ഇന്നലെ നടത്തിയ പരിശോധനയില്‍ ഓറഞ്ചിനുള്ളില്‍ ഗുളിക രൂപത്തിലുള്ള രാസവസ്തു കണ്ടെത്തുകയായിരുന്നു.
ഓറഞ്ച് കേടുകൂടാതെ വളരെക്കാലം ഇരിക്കുന്നതിനായി ഈ രാസവസ്തു ദ്രവരൂപത്തില്‍ സിറിഞ്ചില്‍ കുത്തിവയ്ക്കുന്നതാണെന്നും ഇത് പിന്നീട് കട്ടിയാകുന്നതാണെന്നും അധികൃതര്‍ പറഞ്ഞു.
