ന്യൂഡൽഹി: കഴിഞ്ഞ ദിവസം പഹൽഗാമിൽ നടന്ന ഭീകരാക്രമണത്തിൽ കൊല്ലപ്പെട്ട മലയാളി ഇടപ്പള്ളി സ്വദേശി എൻ. രാമചന്ദ്രന്‍റെ മകൾ ആരതി പറഞ്ഞ ഡ്രൈവർമാരാണ് ഇപ്പോൾ സോഷ്യൽ മീഡിയയിൽ വൈറലാകുന്നത്.
‘എന്‍റെ കൂടെ മുസാഫിർ, സമീർ എന്നീ കാഷ്മീരി ഡ്രൈവർമാരാണ് ഉണ്ടായിരുന്നത്. ഒരനിയത്തിയെ പോലെയാണ് അവരെന്‍റെ കൂടെ നിന്നത്. കാഷ്മീരിൽ നിന്ന് എനിക്ക് രണ്ട് സഹോദരങ്ങളെ കിട്ടി’ എന്നാണ് ആരതി പറഞ്ഞത്.
21നാണ് ആരതിയെും കുടുംബത്തെയും വിമാനത്താവളത്തിൽ നിന്നും ഹോട്ടലിലെത്തിച്ചത്. അവിടെനിന്നും 22ന് അവരെ പഹൽഗാമിലെത്തിച്ചു. ആക്രമണമുണ്ടായ സമയത്ത് തങ്ങൾ താഴെ പാർക്കിംഗ് ഏരിയയിലുണ്ടായിരുന്നു എന്ന് സമീറും മുസാഫിറും പറഞ്ഞു. വെടിയൊച്ച കേട്ടിരുന്നു. എന്താണ് സംഭവിക്കുന്നതെന്ന് ആദ്യം മനസിലായില്ല.
ആക്രമണമുണ്ടായ സമയത്ത് ആരതിയുടെ അമ്മ കാറിൽ ഇരിക്കുന്നുണ്ടായിരുന്നു. ആദ്യം ആരതിയെ ഫോണിൽ വിളിച്ചെങ്കിലും കിട്ടിയില്ല. അച്ഛൻ മരിച്ചുവെന്ന് പിന്നീട് ആരതിയാണ് പറഞ്ഞത്. മൃതദേഹം തിരിച്ചറിയാനും മറ്റ് കാര്യങ്ങൾക്കുമെല്ലാം ഞങ്ങൾ രണ്ടുപേരും ആരതിക്കൊപ്പം ഉണ്ടായിരുന്നു. ആരതിയെ സ്വന്തം സഹോദരിയെ പോലെയാണ് കണ്ടത്. ഇവിടെയെത്തുന്ന എല്ലാവരെയും സഹോദരങ്ങളായാണ് കാണുന്നത്. കാഷ്മീർ പഴയപോലെയായി സഞ്ചാരികൾ ഇവിടെ തിരികെയെത്തണം.” ഇവിടെയെത്തുന്ന എല്ലാവരും തങ്ങൾക്ക് സഹോദരങ്ങളാണെന്ന് സമീറും മുസാഫിറും പറഞ്ഞു.
