സിനിമയിലും സീരിയലുകളിലുമൊക്കെ താരങ്ങള്‍ ഗസ്റ്റ് റോളില്‍ എത്താറുണ്ട്. എന്നാല്‍ പോഡ്കാസ്റ്റ് ഇന്‍റര്‍വ്യൂവിനിടെ അതിഥിയായി പാമ്പ് എത്തിയാലോ? അത്തരമൊരു വാർത്തയാണ് ഓസ്‌ട്രേലിയയില്‍ നിന്ന് വരുന്നത്.
സ്ട്രാറ്റര്‍ജി ഗ്രൂപ്പ് എന്ന പോഡ്കാസ്റ്റ് ചാനലിനുവേണ്ടി ഓണ്‍ലൈന്‍ ഇന്‍റര്‍വ്യൂ നല്‍കുകയായിരുന്നു ആന്‍ഡ്രൂ വാര്‍ എന്ന കര്‍ഷകൻ. ഇന്‍റര്‍വ്യൂ പുരോഗമിക്കുന്നതിനിടെ ഗസ്റ്റ് റോളില്‍ മേല്‍കൂരയില്‍നിന്ന് തൂങ്ങിയിറങ്ങുകയായിരുന്നു പെരുമ്പാമ്പ്. പാമ്പിനെക്കണ്ട് അന്തംവിട്ട അവതാരകര്‍ ഭയന്നു. എന്നാൽ, ‘ഓ അതൊരു കാര്‍പ്പെറ്റ് പൈത്തണ്‍ ആണ്’ എന്നായിരുന്നു വാര്‍ഡിന്‍റെ മറുപടി. പാമ്പിനെ ഉപദ്രവിക്കാതെ അവര്‍ സംഭാഷണം തുടരുകയും ചെയ്തു.
ഓസ്‌ട്രേലിയയില്‍ സാധാരണയായി കണ്ടുവരുന്ന ഒരുതരം പെരുമ്പാമ്പാണ് കാര്‍പ്പെറ്റ് പൈത്തണ്‍. പൊതുവേ ഉപദ്രവകാരികളല്ലാത്ത ഇവയ്ക്ക് വിഷമുണ്ടാകാറില്ല. ഒന്‍പത് അടിയില്‍ കൂടുതൽ നീളവും അഞ്ച് കിലോയോളം ഭാരവും വയ്ക്കുന്ന ഇവയെ ചിലര്‍ വീട്ടില്‍ വളര്‍ത്താറുമുണ്ട്. രാത്രി ഇര പിടിക്കാനിറങ്ങുന്ന കാര്‍പ്പെറ്റ് പൈത്തണുകള്‍ക്ക് നന്നായി മരം കയറാനും സാധിക്കും. ചെറിയ ജീവികളെയും മറ്റും ആഹാരമാക്കുന്ന ഇവയെ പല നിറങ്ങളിലും കാണാറുണ്ട്.വീഡിയോ കാണാൻ ഇവിടെ ക്ലിക് ചെയ്യുക.
