ലോഡ്സ്: ലോകകപ്പ് സെമി കാണാതെ ദക്ഷിണാഫ്രിക്ക പുറത്ത്. നിർണായക മത്സരത്തിൽ പാക്കിസ്ഥാനോടു 49 റണ്‍സിന്‍റെ തോൽവി വഴങ്ങിയാണ് ദക്ഷിണാഫ്രിക്ക സെമി പ്രതീക്ഷകൾ കൈവിട്ടത്.
പാക്കിസ്ഥാൻ ഉയർത്തിയ 309 റണ്‍സ് ലക്ഷ്യം പിന്തുടർന്ന ദക്ഷിണാഫ്രിക്കയ്ക്ക് നിശ്ചിത ഓവറിൽ ഒന്പതു വിക്കറ്റ് നഷ്ടത്തിൽ 259 റണ്‍സ് മാത്രമാണ് നേടാൻ കഴിഞ്ഞത്. കൂറ്റൻ വിജയലക്ഷ്യം പിന്തുടർന്ന ദക്ഷിണാഫ്രിക്കയെ പാക്കിസ്ഥാൻ ബൗളർമാർ വരച്ചവരയിൽ ഒതുക്കി. മത്സരത്തിന്‍റെ ഒരു ഘട്ടത്തിലും വിജയസാധ്യത സൃഷ്ടിക്കാൻ ദക്ഷിണാഫ്രിക്കൻ ബാറ്റ്സ്മാൻമാർക്കു കഴിഞ്ഞില്ല. തകർപ്പൻ അർധസെഞ്ചുറിയുമായി പാക് ബാറ്റിംഗിനെ നയിച്ച ഹാരിസ് സൊഹയ്ലാണു കളിയിലെ താരം.
നായകൻ ഫഫ് ഡുപ്ലസി (63) യാണ് ദക്ഷിണാഫ്രിക്കയുടെ ടോപ് സ്കോറർ. ക്വിന്‍റൻ ഡികോക്ക് (47), വാൻ ഡെർ ഡുസൻ (36), ഡേവിഡ് മില്ലർ (31) എന്നിവർക്കു തുടക്കം ലഭിച്ചെങ്കിലും മുതലാക്കാനായില്ല. വാലറ്റത്ത് ആൻഡിൽ പെഹ്ലുക്വായോ 32 പന്തിൽനിന്നു 46 റണ്‍സുമായി പൊരുതിനോക്കിയെങ്കിലും ലക്ഷ്യം അകലെയായിരുന്നു. പാക്കിസ്ഥാനായി വഹാബ് റിയാസ്, ശതാബ് ഖാൻ എന്നിവർ മൂന്നും മുഹമ്മദ് ആമിർ രണ്ടും വിക്കറ്റ് നേടി.
ആറു ക്യാച്ചുകളാണ് പാക് ഫീൽഡർമാർ നിലത്തിട്ടത്. അതും മുതലാക്കാൻ ദക്ഷിണാഫ്രിക്കയ്ക്കായില്ല. അഫ്ഗാനിസ്ഥാനുശേഷം ലോകകപ്പിൽനിന്നു പുറത്താകുന്ന രണ്ടാം ടീമാണ് ദക്ഷിണാഫ്രിക്ക. ജയത്തോടെ അഞ്ചു പോയിന്റുമായി പാക്കിസ്ഥാൻ സെമി സാധ്യത നിലനിർത്തി.
ടോസ് നേടി ആദ്യം ബാറ്റു ചെയ്ത പാക്കിസ്ഥാൻ നിശ്ചിത ഓവറിൽ ഏഴു വിക്കറ്റ് നഷ്ടത്തിൽ 308 റണ്‍സ് നേടി. ബാബർ അസം (69), ഹാരിസ് സൊഹയ്ൽ (59 പന്തിൽ 89) എന്നിവരുടെ അർധസെഞ്ചുറികളാണ് പാക്കിസ്ഥാനെ മികച്ച സ്കോറിൽ എത്തിച്ചത്.
ഇമാം ഉൾ ഹഖ്-ഫഖർ സമാൻ ഓപ്പണിംഗ് കൂട്ടുകെട്ട് പാക്കിസ്ഥാനു മികച്ച തുടക്കമാണു സമ്മാനിച്ചത്. ഇരുവരും ചേർന്ന് ആദ്യ വിക്കറ്റിൽ 81 റണ്‍സ് അടിച്ചുകൂട്ടി. 44 റണ്‍സ് വീതം നേടി ഇരുവരും ഇമ്രാൻ താഹിറിന് ഇരകളായി. ഇതിനുശേഷമാണ് ബാബർ അസം പാക് ഇന്നിംഗ്സ് കരുപ്പിടിപ്പിക്കുന്നത്. 80 പന്ത് നേരിട്ട അസം ഏഴു ബൗണ്ടറികൾ പായിച്ചു.
സൊഹയ്ലിന്റെ ബാറ്റിംഗ് വെടിക്കെട്ടാണ് പാക്കിസ്ഥാനെ മുന്നൂറ് കടത്തുന്നത്. 38 പന്തിൽനിന്ന് അർധസെഞ്ചുറി തികച്ച സൊഹയ്ൽ, പാക് ഇന്നിംഗ്സിന്‍റെ അവസാന ഓവറിൽ പുറത്തായി. ഒന്പതു ബൗണ്ടറികളും മൂന്നു സിക്സറും സൊഹയ്ൽ പായിച്ചു. മുഹമ്മദ് ഹഫീസ് (20), ഇമാസ് വസിം (23), വഹാബ് റിയാസ് (4) എന്നിവർക്കു കാര്യമായ നേട്ടമുണ്ടാക്കാൻ കഴിഞ്ഞില്ല.
ദക്ഷിണാഫ്രിക്കയ്ക്കായി ലുംഗി എൻഗിഡി 64 റണ്‍സ് വഴങ്ങി മൂന്നു വിക്കറ്റ് നേടി. ഇമ്രാൻ താഹിർ രണ്ടും പെഹ്ലുക്വായോ, എയ്ഡൻ മാർക്രം എന്നിവർ ഓരോ വിക്കറ്റും നേടി.
