ദുബായ്: ഏഷ്യാക്കപ്പ് ക്രിക്കറ്റ് ടൂര്‍ണമെന്റിനിടയില്‍ താരമായ ആ അജ്ഞാത സുന്ദരിയുടെ യഥാര്‍ഥ വ്യക്തിത്വം ഒടുവില്‍ വെളിവായി. ഏഷ്യാക്കപ്പില്‍ ഇന്ത്യയും-ബംഗ്ലാദേശും ഏറ്റുമുട്ടിയപ്പോഴാണ് പാക്ക് ആരാധിക ആദ്യമായി കാമറയില്‍ പ്രത്യക്ഷപ്പെട്ടത്. കറുപ്പ് വേഷത്തിലെത്തിയ സുന്ദരിയുടെ ചിത്രങ്ങള്‍ നിമിഷങ്ങള്‍ക്കുള്ളില്‍ ആരാധകര്‍ ഏറ്റെടുത്ത് വൈറലാക്കിയത്. തുടര്‍ന്ന് ഇന്ത്യാ-പാക്ക് പോരാട്ടത്തില്‍ വീണ്ടും ഈ പാക്ക് സുന്ദരി എത്തിയതോടെ ആരാധകര്‍ക്ക് ഇവളാരെന്ന് കണ്ടുപിടിക്കാതെ ഇരിക്കപ്പൊറുതിയില്ലാതെയായി. ഇതിനിടെ നിവ്യ നവോര എന്നാണ് ഇവളുടെ പേരെന്ന് റിയാലിറ്റി 24-7 എന്ന ട്വിറ്റര്‍ ഹാന്‍ഡില്‍ വന്നതോടെ ആ പേരിലായി ഇന്റര്‍നെറ്റില്‍ സേര്‍ച്ചുകള്‍ മുഴുവന്‍.
ബോളിവുഡിന്റെയും ഷാരൂഖ് ഖാന്റെയും ആരാധികയാണ് ഇവളെന്ന വിവരവും ഇതോടൊപ്പം പുറത്തുവന്നു. ഈ സമയത്ത് നിവ്യാ നവോറ എന്ന പേരിലുള്ള ഫേസ്ബുക്ക്, ഇന്‍സ്റ്റഗ്രാം അക്കൗണ്ട് തേടിയുള്ള പരക്കം പാച്ചിലില്‍ ആയിരുന്നു ക്രിക്കറ്റ് ആരാധകര്‍. ഈ പേരിലുള്ള ഇന്‍സ്റ്റഗ്രാം അക്കൗണ്ടിലേക്ക് പിന്നെ ഫോളോവേഴ്‌സിന്റെ പ്രവാഹമായിരുന്നു. പക്ഷെ പ്രൈവറ്റ് അക്കൗണ്ട് ആയതിനാല്‍ സുന്ദരിയുടെ കൂടുതല്‍ ചിത്രം കാണാമെന്ന പ്രതീക്ഷ അസ്ഥാനത്തായി എന്നു മാത്രം.
അങ്ങനെ ഏഷ്യാക്കപ്പ് ഫൈനല്‍ കഴിഞ്ഞിട്ടും സുന്ദരിയെക്കുറിച്ചുള്ള വിവരങ്ങള്‍ തേടി ആരാധകര്‍ ഇന്റര്‍നെറ്റില്‍ അലയുന്നതു തുടര്‍ന്നു. ഒടുവില്‍ ആരാധകരെ ഞെട്ടിച്ചു കൊണ്ട് ആ സത്യം പുറത്തു വന്നു. ഒരു ദേശീയ ചാനലാണ് സുന്ദരിയുടെ ഇന്റര്‍വ്യൂ നല്‍കി ആരാധകരെ ഞെട്ടിച്ചത്. സുന്ദരിയെപ്പറ്റിയുള്ള ഏറ്റവും പ്രധാന വസ്തുത അവളുടെ പേര് നിവ്യ നവോറ എന്നതല്ലെന്നതായിരുന്നു. റിസ്‌ല റെഹാന്‍ എന്നായിരുന്നു അവളുടെ യഥാര്‍ഥ പേര്. അടുത്ത കാര്യം ആരാധകരുടെ ചങ്കു തകര്‍ക്കുന്നതായിരുന്നു. അവള്‍ വിവാഹിതയാണെന്നതായിരുന്നു ആ യാഥാര്‍ഥ്യം. അവളെ സ്വപ്‌നം കണ്ട് നടന്ന ക്രിക്കറ്റ് ഫാന്‍സിന്റെ മനസ്സില്‍ വെള്ളിടി പോലെയാണ് ഇക്കാര്യം വന്നു പതിച്ചത്. എന്നിരുന്നാലും അവളുടെ യഥാര്‍ഥ പേരിലുള്ള സോഷ്യല്‍ മീഡിയ അക്കൗണ്ടുകള്‍ തേടി ഇന്റര്‍നെറ്റില്‍ സേര്‍ച്ചിംഗ് തുടരുകയാണ് ആരാധകര്‍.
