കാസര്‍ഗോഡ്: 50 ലക്ഷം രൂപ വിലമതിക്കുന്ന 4,82,514 പായ്ക്കറ്റ് പുകയില ഉൽപന്നങ്ങളുമായി രണ്ടുപേര്‍ അറസ്റ്റില്‍. കോഴിക്കോട് വെള്ളിപ്പറമ്പ് കുറ്റുമൂച്ചിക്കാലിലെ എന്‍.പി.അസ്‌കര്‍ അലി (36), കോഴിക്കോട് പന്നിയങ്കര പയ്യനാക്കലിലെ സാദിഖ് അലി (41) എന്നിവരെയാണ് കുമ്പള പോലീസ് അറസ്റ്റ് ചെയ്തത്.
അസ്‌ക്കര്‍ അലിയെ ഇന്നലെ രാത്രി 9.45 ഓടെ മൊഗ്രാലില്‍ എസ്ഐ വി.കെ. വിജയന്‍റ് നേതൃത്വത്തിലാണ് പിടികൂടിയത്.സിവില്‍ പോലീസ് ഓഫീസര്‍മാരായ ചന്ദ്രന്‍, ഹരിശ്രീ എന്നിവരും എസ്എയ്ക്കൊപ്പം ഉണ്ടായിരുന്നു. പിക്കപ്പ് തടഞ്ഞു നിര്‍ത്തി പരിശോധിച്ചപ്പോഴാണ് ചാക്കില്‍ കെട്ടി സൂക്ഷിച്ച നിലയില്‍ പുകയില ഉത്പന്നങ്ങള്‍ കണ്ടെത്തിയത്.
കര്‍ണാടകയില്‍ നിന്നു കോഴിക്കോട്ടേക്ക് കടത്തുകയായിരുന്നു 3,12,000 പായ്ക്കറ്റ് പുകയില ഉൽപന്നങ്ങള്‍. സാദിഖ് അലിയെ കുമ്പള ദേശീയ പാതയില്‍ വച്ച് എസ്ഐ കെ. ശ്രീജേഷിന്‍റെ നേതൃത്വത്തിലാണ് അറസ്റ്റ് ചെയ്തത്.
പിക്കപ്പ് തടഞ്ഞു പരിശോധിച്ചപ്പോള്‍ ചാക്കില്‍ കെട്ടിയ 1,70,514 പാക്കറ്റ് പുകയില ഉത്പന്നങ്ങളാണ് പിടിയിലായത്. പോലീസ് സംഘത്തില്‍ സിപിഒ മാരായ വിനോദ്, മനു എന്നിവരും ഉണ്ടായിരുന്നു. സമീപകാലത്ത് നടന്ന ഏറ്റവും വലിയ പാന്‍ മസാല വേട്ടയാണിത്.
