പരിയാരം: ഭാര്യ തൂങ്ങി മരിച്ചതിനെ തുടർന്ന് ആത്മഹത്യാ പ്രേരണ കുറ്റത്തിന് അറസ്റ്റിലായി ജയിലിൽ കഴിഞ്ഞ യുവാവും ബന്ധുവും ഭാര്യയുടെ ബന്ധുവിന്റെ ബൈക്ക് കത്തിച്ചതിന് അറസ്റ്റിലായി. വിളയാങ്കോട് പെരിയാട്ടെ പുതിയ വീട്ടിൽ ഷൈജു (32), പുതിയ വീട്ടിൽ അരുൺകുമാർ (18) എന്നിവരെയാണ് പരിയാരം മെഡിക്കൽ കോളജ് എസ് ഐ വി.ആർ. വിനീഷ് അറസ്റ്റ് ചെയ്തത്.
ഷൈജുവിന്റെ പീഡനം കാരണം ഭാര്യ മേഘ രണ്ട് മാസം മുമ്പ് തൂങ്ങി മരിച്ചിരുന്നു. ഈ സംഭവത്തിൽ അറസ്റ്റിലായ ഷൈജു കഴിഞ്ഞ ദിവസമാണ് ജയിലിൽ നിന്ന് പുറത്തിറങ്ങിയത്. മേഘയുടെ സഹോദരി യുടെ ഭർത്താവ് കേശവന്‍റെ വീട്ടുവളപ്പിൽ നിർത്തിയിട്ട കെ എൽ 13 എകെ 9049 ബൈക്കിനാണ് ഷൈജുവും അരുണും മറ്റൊരാളും ചേർന്ന് ഇന്നലെ പുലർച്ചെ തീവെച്ചത്.
കേശവനാണ് മേഘയുടെ ആത്മഹത്യക്ക് കാരണക്കാരൻ ഷൈജുവാണെന്ന് കാണിച്ച് പരാതി നൽകിയത്. ഇതിന്‍റെ പ്രതികാരമായാണ് ബൈക്ക് കത്തിച്ചതെന്ന് ഇയാൾ സമ്മതിച്ചതായി പോലീസ് പറഞ്ഞു. ഈ കേസിൽ ഒളിവിൽ കഴിയുന്ന മൂന്നാം പ്രതിയെ കണ്ടെത്താൻ പോലീസ് അന്വേഷണം തുടങ്ങി. കോടതിയിൽ ഹാജരാക്കിയ ഷൈജുവിനേയും അരുണിനേയും രണ്ടാഴ്ചത്തേക്ക് റിമാൻഡ് ചെയ്തു.
