ടെഹ്റാൻ: ബഹുനിലക്കെട്ടിടത്തിനു മുകളിൽനിന്ന് സാഹസികമായി കാമുകിക്ക് ചുംബനം നൽകിയ കായികതാരം ഇറാനിൽ അറസ്റ്റിൽ. പാർക്കൗർ അത്‌ലറ്റായ അലിറേസ ജപലാഗി എന്ന ഇരുപത്തിയെട്ടുകാരനും സുഹൃത്തുമാണ് അറസ്റ്റിലായത്.
കാമുകിയെ ചുംബിക്കുന്ന ചിത്രം അലിറേസ സ്വന്തം ട്വിറ്റർ പേജിൽ പങ്കുവച്ചിരുന്നു. ടെഹ്റാൻ സൈബർ പോലീസാണ് സംഭവം അന്വേഷിച്ച് കേസെടുത്തത്. അലിറേസ പോസ്റ്റ് ചെയ്ത ചിത്രം ശരീയത്ത് നിയമത്തിന് വിരുദ്ധമായതുകൊണ്ടാണ് അറസ്റ്റ് ചെയ്തതെന്നു പോലീസ് അറിയിച്ചു.
അതേസമയം, മുന്പും അലിറേസ ഇത്തരം ചിത്രങ്ങൾ പോസ്റ്റ് ചെയ്തിട്ടുണ്ടെന്നും എന്നാൽ നടപടിയുണ്ടായിട്ടില്ലെന്നും സുഹൃത്തുക്കൾ പറയുന്നു.
നാർക്കോട്ടിക്സ് വിഭാഗത്തിൽ പൊലീസ് ഉദ്യോഗസ്ഥനായിരുന്ന പിതാവിനെ കാണാതായതിനെക്കുറിച്ചുള്ള അന്വേഷണം പരാജയമാണെന്ന് കഴിഞ്ഞ ദിവസം അലിറേസ ട്വീറ്റ് ചെയ്തിരുന്നു. ഇതിന്‍റെ തുടർച്ചയായാണ് അറസ്റ്റ് എന്നാണ് ഇവർ പറയുന്നത്.
