പയ്യന്നൂര്‍(കണ്ണൂർ): പരിശോധനക്കെന്ന് പറഞ്ഞെത്തുന്ന വയോധികന്‍ താലൂക്ക് ആശുപത്രിയില്‍ രോഗികള്‍ക്ക് ശല്യമാകുന്നു.പലവട്ടമായി പലരും താക്കീത് ചെയ്തിട്ടും ഇയാള്‍ പിന്മാറാന്‍ കൂട്ടാക്കുന്നുമില്ല.
രാവിലെ എത്തിയ ഉടന്‍ ബോര്‍ഡില്‍ നോക്കി ഇല്ലാത്ത ഡോക്ടര്‍മാരുടെ വിവരം മനസിലാക്കുന്നതാണ് ഇയാളുടെ പരിശോധനയുടെ ആദ്യഘട്ടം. പിന്നീട് ഒപി ചീട്ടിനായി ക്യൂ നില്‍ക്കുന്ന യുവതികളുടെ ഇടയില്‍ കയറി നില്‍പ്പുറപ്പിക്കും.പ്രായമുള്ളയാളായതിനാല്‍ ആരും എതിര്‍ക്കാറുമില്ല.
പിന്നീട് യുവതികളെ തട്ടുന്ന വിധത്തില്‍ അങ്ങോട്ടുമിങ്ങോട്ടുമുള്ള ആട്ടമാണ്.ഇതിനിടയില്‍ പോക്കറ്റില്‍നിന്നും പൈസയെടുത്ത് അറിയാത്ത ഭാവത്തില്‍ താഴേക്കിടും.പിന്നീട് തിരക്കുള്ള ക്യൂവില്‍ കുനിഞ്ഞ് പൈസയെടുക്കാനുള്ള ശ്രമമാണ് നടത്തുന്നത്.
ഇങ്ങിനെ കുനിയുമ്പോള്‍ മുന്നിലും പിന്നിലും നില്‍ക്കുന്ന യുവതികളുടെ ദേഹത്ത് തട്ടുന്നതിനാണ് ഈ സാഹസം.ഒടുവില്‍ ആശ്വാസത്തോടെ കൗണ്ടറിലെത്തി എതെങ്കിലും കുട്ടിയുടെ പേര് പറഞ്ഞ് ഒരു ടോക്കണ്‍ വാങ്ങുകയും പിന്നീട് അത് കീറി ചവറ്റുകുട്ടയിലിട്ട് സ്ഥലം വിടുകയുമാണ് ഇയാളുടെ ഹോബി.
ഈ ശല്യം പതിവായതോടെ ആശുപത്രി അധികൃതരുടെയടുത്ത് ചിലര്‍ പരാതിയുമായി എത്തിയിട്ടുണ്ട്.ഇയാളെ എങ്ങനെയൊതുക്കാന്‍ കഴിയുമെന്ന ആലോചനയിലാണ് ഇപ്പോള്‍ ആശുപത്രിയധികൃതര്‍.
