കോട്ടയം: പിണറായി മന്ത്രിസഭയിൽനിന്ന് അപ്രതീക്ഷിതമായി ആദ്യ രാജി പ്രഖ്യാപനം ഉണ്ടായതിനു പിന്നാലെ പി.സി.ജോർജിന്‍റെ ഭാര്യ ഉഷ കഴിഞ്ഞ ദിവസം നടത്തിയ പരാമർശം ഒാർമിപ്പിച്ച ഫേസ്ബുക്ക് പോസ്റ്റ് വൈറലായി.
മന്ത്രി സജി ചെറിയാന്‍റെ രാജിക്കു പിന്നാലെയാണ് “പൂഞ്ഞാർ ആശാൻ പി.സി.ജോർജ്’’ എന്ന ഫേസ്ബുക്ക് പേജിൽ പോസ്റ്റ് പ്രത്യക്ഷപ്പെട്ടത്.
പി.സി.ജോർജിനെ കഴിഞ്ഞ ദിവസം സോളാർ കേസ് പ്രതിയുടെ പരാതിയിൽ അറസ്റ്റ് ചെയ്തതിനെത്തുടർന്നു ഭാര്യ ഉഷ മുഖ്യമന്ത്രി പിണറായി വിജയനെതിരേ നടത്തിയ പരാമർശങ്ങൾ ചൂണ്ടിക്കാണിച്ചാണ് ഫേസ്ബുക്ക് പോസ്റ്റിലെ പരിഹാസം.
ജോർജിനെ അറസ്റ്റ് ചെയ്തതിനു പിന്നാലെ മാധ്യമങ്ങൾക്കു മുന്നിലെത്തിയ ഉഷ കടുത്ത വിമർശനം അഴിച്ചുവിട്ടിരുന്നു. പിണറായി ഒരാഴ്ചയ്ക്കുള്ളിൽ അനുഭവിക്കുമെന്നും കൊന്തയ്ക്കു ശക്തിയുണ്ടെന്നും ഉഷ പറഞ്ഞു.
ദിവസങ്ങൾക്കുള്ളിൽ അപ്രതീക്ഷിതമായി മന്ത്രി രാജിവയ്ക്കേണ്ടി വന്നതോടെ “കൊന്തയ്ക്കു ശക്തിയുണ്ടെന്നു വീണ്ടും വെളിപ്പെടുന്നു.
ആദ്യ വിക്കറ്റ് തെറിച്ചു പിണറായി സർക്കാർ’ എന്ന പോസ്റ്റാണ് പേജിൽ പ്രത്യക്ഷപ്പെട്ടത്. ’ഒരാഴ്ച സമയം പോലും എടുത്തില്ലല്ലോ ബിരിയാണി ബിജ്യാ… എന്ന കമന്‍റോടെയാണ് പോസ്റ്റ് ഇട്ടിരിക്കുന്നത്.
