കൊണ്ടോട്ടി: കാലിക്കട്ട് സർവകലാശാലയിലെ വിദ്യാർഥിനികളോട് അപമര്യാദയായി പെരുമാറിയ സംഭവത്തിൽ സിപിഎം ബ്രാഞ്ച് സെക്രട്ടറിയുൾപ്പെടെ മൂന്നു പേർ അറസ്റ്റിൽ.നെടിയിരുപ്പ് എൻഎച്ച് കോളനി ബ്രാഞ്ച് സെക്രട്ടറി ഷാജി(42), എൻഎച്ച് കോളനി സ്വദേശികളായ രവി(45), ഷൈജു(34) എന്നിവരെയാണ് കൊണ്ടോട്ടി പോലീസ് അറസ്റ്റ് ചെയ്തത്. വ്യാഴാഴ്ച ഉച്ചയ്ക്ക് ശേഷമാണ് കേസിനാസ്പദമായ സംഭവം.
ഇംഗ്ലീഷ് പിജി വിദ്യാർഥിനികളായ മൂന്നു പേർ നെടിയിരുപ്പ് എൻഎച്ച് കോളനിക്ക് സമീപത്തെ മിനി ഊട്ടിയിൽ ഡോക്യുമെന്ററി ഷൂട്ടിംഗിനായി എത്തിയതായിരുന്നു. ഇരുചക്ര വാഹനത്തിൽ എത്തിയ രവിയും ഷൈജുവും ഇവരോട് മോശമായി പെരുമാറിയെന്നാണ് പരാതി.
വിദ്യാർഥിനികളുടെ കയ്യിൽ കയറിപിടിച്ചതായും മൊബൈലിൽ ഫോട്ടോ എടുത്തതായും പരാതിയിൽ പറയുന്നു. അസഭ്യം പറയുകയും തടഞ്ഞു നിർത്തുകയും ചെയ്തു. പ്രശ്നത്തിനിടെ ഒത്തുതീർപ്പിനെത്തിയഷാജിയും ഇവർക്കൊപ്പം ചേരുകയായിരുന്നുവെന്നാണ് വിദ്യാർഥിനികളുടെ പരാതി.
