പരിയാരം: വീട്ടമ്മയോട് അതിക്രമം കാണിച്ച യുവാവിനെ പരിയാരം പോലീസ് അറസ്റ്റ് ചെയ്തു. പരിയാരം തൊണ്ടന്നൂരിലെ അരയാല്‍ തറമ്മല്‍ സന്തോഷിനെയാണ് (45) ഇന്നലെ രാത്രി പ്രിന്‍സിപ്പല്‍ എസ്ഐ വി.ആര്‍.വിനീഷിന്‍റെ നേതൃത്വത്തില്‍ പിടികൂടിയത്.
ഇന്നലെ ഉച്ചയ്ക്കാണു ഭര്‍ത്താവ് ജോലിയ്ക്കു പോയസമയത്തു വീട്ടില്‍ തനിച്ചു കഴിയുകയായിരുന്ന 59 കാരിയെ സന്തോഷ് അതിക്രമിച്ചുകയറി കടന്നുപിടിച്ചത്. വീട്ടമ്മ ബഹളംവച്ചപ്പോള്‍ ഇയാള്‍ ഓടിരക്ഷപ്പെടുകയായിരുന്നു.
വൈകുന്നേരം ഭര്‍ത്താവ് എത്തിയശേഷമാണു പരിയാരം മെഡിക്കല്‍ കോളജ് പോലീസ് സ്‌റ്റേഷനില്‍ പരാതി നല്‍കിയത്.
വീട്ടമ്മയെ തളിപ്പറമ്പ് താലൂക്ക് ആശുപത്രിയില്‍ വൈദ്യപരിശോധനയ്ക്കു വിധേയയാക്കി. പ്രതിയെ ഇന്നു പയ്യന്നൂര്‍ കോടതിയില്‍ ഹാജരാക്കും.
