തിരുവനന്തപുരം: പീഡനത്തിനിരയായതിനെത്തുടർന്ന് ജീവനൊടുക്കാൻ ശ്രമിച്ച പതിനഞ്ചുകാരി മരിച്ചു. സംഭവത്തിൽ ബന്ധു അറസ്റ്റിൽ. ഉത്തർ പ്രദേശ് സ്വദേശിയായ മുക്കിം (30) നെയാണ് പൂജപ്പുര പോലീസ് അറസ്റ്റ് ചെയ്തത്.
തിരുമല പ്രദേശത്ത് വർഷങ്ങളായി മാതാപിതാക്കളോടൊപ്പം താമസിച്ച് വരികയായിരുന്ന പെണ്‍കുട്ടിയെ എട്ടു വയസുമുതൽ പ്രതി പീഡിപ്പിച്ച് വരികയായിരുന്നുവെന്ന് പോലീസ് പറഞ്ഞു. പീഡനത്തിൽ മനം നൊന്ത് പെണ്‍കുട്ടി കഴിഞ്ഞ ദിവസം ദേഹത്ത് മണ്ണെണ്ണയൊഴിച്ച് തീ കൊളുത്തിയിരുന്നു.
ഗുരുതരമായി പൊള്ളലേറ്റ പെണ്‍കുട്ടിയെ മെഡിക്കൽ കോളജാശുപത്രിയിൽ പ്രവേശിപ്പിച്ച് ചികിത്സ നൽകി വരികയായിരുന്നു. ഇന്നലെ രാത്രിയിൽ പെണ്‍കുട്ടി മരണമടയുകയായിരുന്നു. പെണ്‍കുട്ടിയുടെ മൊഴിയുടെ അടിസ്ഥാനത്തിലാണ് ബന്ധുവായ യുവാവിനെ പൂജപ്പുര പോലീസ് പോക്സോ വകുപ്പ് പ്രകാരം അറസ്റ്റ് ചെയ്തത്.
പൂജപ്പുര പോലീസ് മേൽനടപടി സ്വീകരിച്ചു. മൃതദേഹം പോസ്റ്റ്മോർട്ടത്തിനായി മെഡിക്കൽ കോളജാശുപത്രി മോർച്ചറിയിലേക്ക് മാറ്റി.
