മഞ്ചേരി: പോക്സോ കേസിൽ ജാമ്യത്തിലിറങ്ങിയ പ്രതി കുത്തേറ്റു മരിച്ച സംഭവത്തിൽ യുവാവ് അറസ്റ്റിൽ. മഞ്ചേരിയ്ക്കടുത്തു പയ്യനാട് ചോലക്കൽ അത്താണിക്കൽ കല്ലിടുന്പിൽ പരേതനായ പള്ളിക്കണ്ടി മൂസയുടെ മകൻ സൈതലവി (56) യാണ് കൊല്ലപ്പെട്ടത്. സംഭവവുമായി ബന്ധപ്പെട്ട് അയൽവാസി പയ്യനാട് പുളിക്കൽ ജംഷീദി(35) നെ പോലീസ് ഇന്നലെ കസ്റ്റഡിയിലെടുത്തിരുന്നു. തുടർന്നു ഇയാളുടെ അറസ്റ്റ് കേസന്വേഷിക്കുന്ന മഞ്ചേരി സിഐ സി. അലവി ഇന്നു രാവിലെ രേഖപ്പെടുത്തി.
പ്രായപൂർത്തിയാകാത്ത പെണ്‍കുട്ടിയെ ലൈംഗിക പീഡനത്തിന് വിധേയയാക്കിയെന്ന കേസിൽ പ്രതിയാണ് സൈതലവി. 2016ലാണ് പീഡനക്കേസ് നടന്നത്. ഈ കേസിൽ മഞ്ചേരി പോലീസ് അറസ്റ്റ് ചെയ്ത് റിമാൻഡിലായ പ്രതി ജാമ്യത്തിലിറങ്ങിയതായിരുന്നു. കേസിൽ അടുത്തമാസം നാലിനു മഞ്ചേരി പോക്സോ സ്പെഷൽ കോടതിയിൽ ഹാജരാകാനിരിക്കെയാണ് സൈതലവി കൊല്ലപ്പെട്ടത്. ഇന്നലെ രാവിലെ പതിനൊന്നര മണിയോടെ അത്താണിക്കലിലെ കമുകിൻ തോട്ടത്തിലാണ് മൃതദേഹം കാണപ്പെട്ടത്.
സമീപവാസികൾ അറിയിച്ചതിനെ തുടർന്നു സിഐ സി. അലവിയുടെ നേതൃത്വത്തിലുള്ള പോലീസ് സംഘം സ്ഥലത്തെത്തുകയായിരുന്നു. ഉന്നത പോലീസ് ഉദ്യോഗസ്ഥരുടെ നേതൃത്വത്തിൽ നടത്തിയ പരിശോധനയിൽ സംഭവ സ്ഥലത്തു നിന്നു കൊലപാതകത്തിനുപയോഗിച്ച കത്തി കണ്ടെടുത്തു. മൃതദേഹത്തിൽ പതിനാറോളം മുറിവുകളാണ് കാണപ്പെട്ടത്.
ആന്തരികാവയവങ്ങൾ പുറത്തു വന്ന നിലയിലായിരുന്നു. ഫോറൻസിക് സയന്‍റിഫിക് ഓഫീസർ ഡോ. ത്വയ്ബയും സംഘവം സ്ഥലത്തെത്തി പരിശോധന നടത്തി. മലപ്പുറത്തു നിന്നു വിരലടയാള വിദഗ്ധരും എത്തിയിരുന്നു.
സംഭവത്തിൽ മഞ്ചേരി പോലീസ് കേസെടുത്ത് അന്വേഷണം ആരംഭിച്ചു. സൈതലവിയുടെ മൃതദേഹം ഇന്നു രാവിലെ മഞ്ചേരി മെഡിക്കൽ കോളജ് ആശുപത്രിയിൽ പോസ്റ്റുമോർട്ടത്തിനുശേഷം ബന്ധുക്കൾക്കു വിട്ടുകൊടുത്തു. പ്രതിയെ ഇന്നു കോടതിയിൽ ഹാജരാക്കും.
