കോട്ടയം: ഏറ്റുമാനൂരില്‍ പ്രവര്‍ത്തിക്കുന്ന പെറ്റ്സ് ഷോപ്പ് കുത്തിത്തുറന്ന് പണവും നായ്ക്കുട്ടികളെയും മോഷ്ടിച്ച കേസില്‍ ഒരാളെ പോലീസ് അറസ്റ്റ് ചെയ്തു.
തിരുവനന്തപുരം ആലംകോട് ഭാഗത്ത് റംസിം മന്‍സില്‍ അയൂബ് ഖാന്‍ (62) നെയാണ് ഏറ്റുമാനൂര്‍ പോലീസ് അറസ്റ്റ് ചെയ്തത്.
ഇയാള്‍ കഴിഞ്ഞ 13ന് രാത്രിയോടെ ഏറ്റുമാനൂര്‍ കെഎസ്ആര്‍ടിസി ബസ് സ്റ്റാന്‍ഡിന് സമീപം പ്രവര്‍ത്തിക്കുന്ന പെറ്റ്സ് ഷോപ്പിന്‍റെ ഷട്ടര്‍ കുത്തിത്തുറന്ന് അകത്തുകയറി മേശയ്ക്കുള്ളില്‍ സൂക്ഷിച്ചിരുന്ന 15,000 രൂപയും അവിടെയുണ്ടായിരുന്ന നാലു നായ്ക്കുട്ടികളെയും മോഷ്ടിച്ചു കാറില്‍ കടന്നുകളയുകയായിരുന്നു.
പരാതിയെത്തുടര്‍ന്ന് ഏറ്റുമാനൂര്‍ പോലീസ് കേസ് രജിസ്റ്റര്‍ ചെയ്തു നടത്തിയ അന്വേഷണത്തില്‍ ഇയാളെ പിടികൂടുകയുമായിരുന്നു. എസ്എച്ച്ഒ പ്രസാദ് എബ്രഹാം വര്‍ഗീസിന്‍റെ നേതൃത്വത്തിലാണ് ഇയാളെ അറസ്റ്റ് ചെയ്തത്. ഇയാള്‍ക്ക് വെഞ്ഞാറമൂട്, അഞ്ചല്‍, ഇടവണ്ണ, ആറ്റിങ്ങല്‍ എന്നീ സ്റ്റേഷനുകളില്‍ ക്രിമിനല്‍ കേസുകളുണ്ട്.
