കൊച്ചി: തുടര്‍ച്ചയായ ഒമ്പതാം ദിവസവും സംസ്ഥാനത്ത് ഇന്ധനവിലയില്‍ വര്‍ധനവ്. പെട്രോളിന് 48 പൈസയും ഡീസലിന് 55 പൈസയുമാണ് കൂടിയത്.
ഇതോടെ കൊച്ചിയില്‍ പെട്രോളിന്റെ വില 76.59 രൂപയും ഡീസലിന്‍റെ വില 70.81 രൂപയുമായി. തിരുവനന്തപുരത്ത് പെട്രോളിന് 77.96 രൂപയും ഡീസലിന് 72.12 രൂപയുമാണ്.
ഇതോടെ കഴിഞ്ഞ ഒമ്പതു ദിവസത്തിനുള്ളില്‍ പെട്രോളിന് അഞ്ചു രൂപയുടെയും ഡീസലിന് 4.96 രൂപയുടെയും വര്‍ധനവാണ് ഉണ്ടായിരിക്കുന്നത്.
അന്താരാഷ്‌ട്ര വിപണിയില്‍ ക്രൂഡ് ഓയില്‍ വില വര്‍ധിക്കുന്നത് ചൂണ്ടിക്കാട്ടിയാണ് പെട്രോളിനും ഡീസലിനും എണ്ണക്കമ്പനികള്‍ വില വര്‍ധിപ്പിക്കുന്നത്. കോവിഡ് കാലത്തെ പ്രതിസന്ധിയില്‍ ഇന്ധനവലിയിലുണ്ടാകുന്ന വിലവര്‍ധനവ് സാധാരണക്കാരെ ആശങ്കയിലാക്കിയിരിക്കുകയാണ്.
വിലവര്‍ധനവിനെതിരേ വ്യാപക പ്രതിഷേധം ഉയരുന്നുണ്ട്. ഇന്ധനവിലവര്‍ധനവ് മൂലം അവശ്യസാധനങ്ങള്‍ക്കടക്കം വില കൂടുമോയെന്ന ആശങ്കയിലാണ് ജനങ്ങള്‍.
