ജോർജ് കള്ളിവയലിൽ
ന്യൂഡൽഹി: പെട്രോൾ വില രണ്ടു മാസത്തിനുള്ളിൽ ലിറ്ററിന് ഏഴു രൂപ കൂട്ടി. ഡീസൽ വിലയും നാലു രൂപ കൂട്ടി. പെട്രോളിന് എട്ടു മാസത്തിനിടയിലെ ഏറ്റവും കൂടിയ വിലയാണ് പൊതുമേഖലയിലെ കന്പനികളും റിലയൻസ് അടക്കമുള്ള സ്വകാര്യ കന്പനികളും ഇപ്പോൾ ഈടാക്കുന്നത്. അസംസ്കൃത എണ്ണയുടെ അന്താരാഷ്‌ട്ര വില താഴ്ന്നു നിൽക്കുന്പോഴാണ് ദിവസവും പെട്രോൾ വില കൂട്ടുന്നത്.
പെട്രോൾ വില ഇങ്ങനെ കൂടിയിട്ടും പ്രതിപക്ഷകക്ഷികൾ മൗനത്തി ലാണ്.രാജ്യത്ത് ഏറ്റവും കൂടിയ പെട്രോൾ വിലയുള്ള മുംബൈയിൽ 80 രൂപയോട് അടുത്തു. മുംബൈയിൽ ഇന്നലെ പെട്രോൾ ലിറ്ററിന് 79.41 രൂപയാണ് വില. കേന്ദ്ര, സംസ്ഥാന നികുതികൾക്കു പുറമേ വരൾച്ച സെസ് എന്ന പേരിൽ അധികമായി ലിറ്ററിന് മൂന്നു രൂപ വീതം വാങ്ങുകയാണ്.
കേരളത്തിൽ പെട്രോളിനു താരതമ്യേന വിലക്കുറവുള്ള എറണാകുളത്ത് ലിറ്ററിന് 73.21 രൂപയായി ഉയർന്നു. ഡീസലിന് എറണാകുളത്ത് 62.86 രൂപയാണ്. മറ്റു പല ജില്ലകളിലും ചെറിയ തോതിൽ വില ഇതിലും കൂടുതലാണ്. ഡൽഹിയിൽ പെട്രോൾ ലിറ്ററിന് വില 70 രൂപ കടന്നു. ലിറ്ററിന് 70.30 രൂപയാണ് രാജ്യതലസ്ഥാനത്ത് ഇന്നലത്തെ വില. കഴിഞ്ഞ എല്ലാ ദിവസങ്ങളിലും എണ്ണ വിതരണ കന്പനികൾ തുടർച്ചയായി വില കൂട്ടുകയാണ്.
ജൂണ്‍ 16നാണ് രാജ്യത്ത് ദിവസേന വില പുതുക്കി നിശ്ചയിക്കൽ (ഡൈനാമിക് പ്രൈസിംഗ്) സംവിധാനം നടപ്പാക്കിയത്. ഇതിനുശേഷമുള്ള ആദ്യത്തെ ആഴ്ചയിൽ വിലയിൽ രണ്ടര രൂപയോളം കുറവു വരുത്തി. ജൂണ്‍ 16നു ഡൽഹിയിൽ ലിറ്ററിന് 65.48 രൂപയായിരുന്നത് 15 ദിവസം കഴിഞ്ഞ് ജൂലൈ ഒന്നിന് 63.09 രൂപയായി. ജനങ്ങളെ തുടക്കത്തിൽ ആശ്വസിപ്പിച്ച ശേഷം തുടർന്നങ്ങോട്ട് പടിപടിയായി വില കൂട്ടുകയായിരുന്നു. ഇന്നലെ വില ലിറ്ററിന് 70.30 രൂപയായി.
മാസത്തിൽ രണ്ടു തവണ പെട്രോൾ, ഡീസൽ വിലകൾ അവലോകനം ചെയ്തിരുന്ന 15 വർഷം നീണ്ട രീതി അവസാനിപ്പിച്ചാണ് നരേന്ദ്ര മോദി സർക്കാർ ദിവസേന വില പുനർനിർണയിക്കാൻ പൊതുമേഖലാ എണ്ണക്കന്പനികൾക്ക് അനുമതി നൽകിയത്.
114 ഡോളർ ആയപ്പോൾ 79 രൂപ, 54 ഡോളറിന് 73 രൂപ
ഇന്ത്യയിൽ പെട്രോൾ വില സർവകാല റിക്കാർഡ് കുറിച്ചത് 2013 സെപ്റ്റംബർ 14നാണ്. അന്നു ക്രൂഡ് ഓയിൽ വില അന്താരാഷ്‌ട്ര വിപണിയിൽ വീപ്പയ്ക്ക് 114.44 ഡോളറായിരുന്നു. അന്ന് പെട്രോൾ ലിറ്ററിന് കേരളത്തിൽ 78.41 മുതൽ 79.01 വരെ രൂപയായിരിന്നു. ഇന്നലെ ക്രൂഡ് ഓയിൽ വില 53.69 ഡോളർ മാത്രം.
നരേന്ദ്ര മോദിയുടെ ഭരണത്തിൽ പെട്രോളിനും ഡീസലിനും ഏറ്റവും കൂടിയ വില ഈടാക്കിയിരുന്നത് അധികാരമേറ്റതിന്‍റെ തൊട്ടടുത്ത മാസങ്ങളിലാണ്. 2014 ജൂലൈ ഒന്നിന് പെട്രോൾ ലിറ്ററിന് രണ്ടു രൂപയും ഡീസൽ ലിറ്ററിന് 50 പൈസയും വർധിപ്പിച്ചു. ഇതോടെ കേരളത്തിൽ പെട്രോൾ 76.11 രൂപ മുതൽ 77.35 രൂപ വരെയായി. ഡീസലിന് 60.95 മുതൽ 6.210 രൂപവരെയും.
