ന്യൂഡൽഹി: ചൈന ഇന്ത്യയിൽനിന്നുള്ള പോർക്ക് ഇറക്കുമതി നിരോധിക്കാൻ ഒരുങ്ങുന്നതായി റിപ്പോർട്ട്. ആഫ്രിക്കൻ പന്നിപ്പനി ചൈനയിലേക്കു വ്യാപിക്കാതിരിക്കാനാണ് നിരോധന നീക്കം എന്നാണ് ഔദ്യോഗികഭാഷ്യം. എന്നാൽ അതിർത്തി സംഘർഷവുമായി ഇതിനു ബന്ധമുണ്ടെന്നു ചൈനീസ് പത്രം ഗ്ലോബൽ ടൈംസ് റിപ്പോർട്ടിൽ പറയുന്നു.
2018 ഓഗസ്റ്റിൽ ചൈനയിലാണ് ആഫ്രിക്കൻ പന്നിപ്പനി പൊട്ടിപ്പുറപ്പെട്ടത്. ഇന്ത്യയിൽ ഈ മാസമാദ്യം ആസാമിൽ രോഗബാധ കണ്ടു. പക്ഷേ വേറേ സ്ഥലങ്ങളിൽ ഇല്ല. പന്നിമാംസം ചൈനയിൽ ഏറെ പ്രിയപ്പെട്ടതാണ്.
അമേരിക്കയടക്കമുള്ള രാജ്യങ്ങളിൽനിന്ന് ഇത് ഇറക്കുമതി ചെയ്യുന്നു. കഴിഞ്ഞവർഷം ചൈനയിൽ പന്നിമാംസം കിലോഗ്രാമിന് 500 രൂപയിലധികമായിരുന്നു.
